ރާއްޖޭގައި މަރުގެ އަދަބު ތަންފީޒުކުރުމަކީ ޔާމީންގެ ވެރިކަމުގައި 2013 ގެ ރިޔާސީ ވައުދެކެވެ. އަދި ޔާމީންގެ ވެރިކަމުގައި 2017 ވަނަ އަހަރު މަރުގެ އަދަބު ތަންފީޒުކުރަން ފަށާނެކަން އިއުލާންކޮށް އެކަމަށް ތައްޔާރުވެފައިވާކަމަށްވެސް އޭރު ސަރުކާރުން ބުނިއެވެ.
ޕީއެންއެފްއިން ރޭ ބޭއްވި ޖަލްސާގައި ވާހަކަ ދައްކަވަމުން ޔާމީން ވިދާޅުވީ ސުޕްރީމް ކޯޓުގެ ނިންމުންތަކަކީ ފަހުގެ ނިންމުންތަކަށް ވިޔަސް ބައެއް މައްސަލަތަކުގައި ސުޕްރީމް ކޯޓުން ހުކުމް ނެރެފައި ވަނީ ރަނގަޅަށް ނޫންކަމަށެވެ. އެހެންކަމުން ބައެއް ހުކުމްތަކަށް އިތުބާރު ނުކުރެވޭ ކަމަށް ޔާމީން ވިދާޅުވިއެވެ.
ޔާމީން ވިދާޅުވީ ސުޕްރީމް ކޯޓަކީ މޫސުމީ ތަނަކަށް ވެގެން ނުވާނެ ކަމަށާއި އެކަމަކު އެ ތަނުގެ ނިންމުންތަކުން ފެންނަނީ އެފަދަ މަންޒަރެއް ކަމަށެވެ. އެގޮތުން ޔާމީން އިޝާރާތް ކުރެއްވީ އެމަނިކުފާނުގެ ވަރަށް ގާތްކޮށް ކުރިން ހުންނެވި މިހާރުގެ ރައްޔިތުން މަޖލީހުގެ ނައިބު ރައީސް އަހްމަދު ނާޒިމަށް ޔާމިންގެ ވެރިކަމުގައި އިއްވި 25 އަހަރުގެ ޖަލު ހުކުމް ސުޕްރީމް ކޯޓުން ބާތިލުކުރި މައްސަލައަށެވެ.
ޔާމީން ވިދާޅުވާ ގޮތުން އެ ހުކުމް ސުޕްރީމް ކޯޓުން ބާތިލުކުރީ ރައީސް އިބްރާހިމް މުހައްމަދު ސާލިގާއި ނާޒިމާއި އޮތް ގުޅުމެއްގެ ތެރެއިން އުސޫލުތަކާއި ހިލާފަށްްކަމަށެވެ.
އެހެންކަމުން މިހާރު މިތިބި ފަނޑިޔާރުން ތިބެގެން މަރުގެ އަދަބު ތަންފީޒުކުރުމަކީ ރައީސުލްޖުމްހޫރިއްޔާ ކުރާވަރުގެ ކަމެއް ކަމަށް ގަބޫލު ނުކުރައްވާ ކަމަށް ވެސް ޔާމީން ވިދާޅުވިއެވެ. އަދި އެ ހާލަތުގައި ޝަރުއީ ނިޒާމު އޮއްވާ މަރުގެ ހުކުމް ތަންފީޒުކުރުމަށް ކެރޭނީ ކޮން ރައީސަކަށްތޯވެސް ޔާމީން ސުވާލު އުފެއްދެވިއެވެ.
ސުޕްރީމް ކޯޓުގެ ނިންމުންތަކުގައި ސިޔާސީ ކުލަ ނުޖެހި، އެއީ ފައިނަލް ނިންމުން ކަމާމެދު ރައްޔިތުންގެ އިތުބާރު ލިބޭނެ ގޮތެއް ހޯދަންޖެހޭ ކަމަށާއި އަދި ސުޕްރީމް ކޯޓުގެ ނިންމުންތަކާމެދު ޖަވާބުދާރީ ކުރެވޭނެ ގޮތެއްވެސް ހޯދަން ޖެހޭ ކަމަށް ޔާމީން ވިދާޅުވިއެވެ.
