މިއީ މި ސަރުކާރުން އެ ކުންފުނީގެ ޑީއެމްޑީގެ މަގާމަށް ބޭފުޅަކު އައްޔަންކުރި ފަސް ވަނަ ފަހަރެވެ. ފެނަކައިން ވަނީ ސޯޝަލް މީޑިއާ މެދުވެރިކޮށް މި އައްޔަންކުރުން ކަށަވަރުކޮށްދީފަ އެވެ.
މި އައްޔަންކުރުމާއެކު ފެނަކަގައި މިހާރު ދެ ޑެޕިއުޓީ މެނޭޖިން ޑިރެކްޓަރުން އެބަތިއްބެވި އެވެ. އެއީ އާދަމް ތައުފީގުގެ އިތުރުން އެ މަގާމުގައި ހުންނެވި މުހައްމަދު އާރިފް އެވެ. ފަހަކަށް އައިސް އެ ކުންފުނީގެ އިސް މަގާމުތަކަށް ބަދަލުތަކެއް އަންނަމުންދާއިރު، ޑީއެމްޑީ ކަމުގެ މަގާމުން އެންމެ ފަހުން އިސްތިއުފާ ދެއްވީ މުހައްމަދު އަބްދުލް ކަރީމް (ރުކުމާ) އެވެ. އޭގެ ކުރިން ވެސް އެ މަގާމަށް އައްޔަންކުރި ބައެއް ބޭފުޅުން ވަނީ އިސްތިއުފާ ދެއްވާފަ އެވެ.
އާދަމް ތައުފީގު އަކީ ސަރުކާރުގެ މަގާމުތަކަށް އާ ބޭފުޅެއް ނޫނެވެ. އޭނާ ވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި އިކޮނޮމިކް މިނިސްޓްރީގެ ޑެޕިއުޓީ މިނިސްޓަރުގެ މަގާމު ފުރުއްވާފަ އެވެ. މީގެ އިތުރުން އާދަމް ތައުފީގު އަކީ ޕީއެންސީގެ ކައުންސިލް މެމްބަރެއްގެ ގޮތުގައި ވެސް މަސައްކަތް ކުރައްވާފައިވާ ބޭފުޅެކެވެ.
