މި ދިރާސާ ކުރިއަށް ގެންގޮސްފައިވަނީ ގާތްގަނޑަކަށް 480,000 މީހުންނާ އެކު، އެވްރެޖުކޮށް 13 އަހަރު ދުވަހުގެ މުއްދަތަށެވެ. މި ދިރާސާއިން ދައްކާ ގޮތުގައި، ކާރު ދުއްވުން ނުވަތަ އާންމު ދަތުރުފަތުރު ފަދަ ހަރަކާތްތެރި ނޫން ވަސީލަތްތައް އެކަނި ބޭނުންކުރާ މީހުންނާ އަޅާ ބަލާއިރު، ބައިސްކަލު ދުއްވާ މީހުން ޑިމެންޝިއާ ޖެހުމުގެ ފުރުސަތު ވަރަށް ކުޑައެވެ.
އަދި މި ދިރާސާއިން ދައްކާ ގޮތުގައި، ބައިސްކަލް ދުއްވާ މީހުންނަށް ޑިމެންޝިއާ ޖެހުމުގެ ފުރުސަތު 19 އިންސައްތަ ކުޑަވާއިރު، އަލްޒައިމާ ބަލި ޖެހުމުގެ ފުރުސަތު 22 އިންސައްތަ ކުޑައެވެ. ދިރާސާ ކުރި ފަރާތްތަކުން ފާހަގަ ކުރި ގޮތުގައި، ބައިވެރިންގެ ތެރެއިން ބަޔެއް މީހުންގެ ސިކުނޑީގެ ސްކޭންތަކުން ދައްކާ ގޮތުގައި، ގިނައިން ބައިސްކަލް ދުއްވާ މީހުންގެ "ހިޕޮކެމްޕަސް" (ސިކުނޑީގެ ހަނދާން ކުރުމުގައި މުހިންމު ދައުރެއް އަދާކުރާ ބައި) ބޮޑެވެ. މިއީ މުހިންމު ކަމެކެވެ. ސަބަބަކީ އަލްޒައިމާ ބަލީގައި އެންމެ ފުރަތަމަ އަސަރުކުރާ އެއް ބަޔަކީ ހިޕޮކެމްޕަސް ކަމަށް ވާތީއެވެ.
މި ދިރާސާއިން ޖެނެޓިކްސްގެ ދައުރު، ހާއްސަކޮށް އަލްޒައިމާ ޖެހުމުގެ ފުރުސަތު އިތުރުކުރާ 'APOE e4' ކިޔާ ޖީންގެ ދައުރުވެސް ބަލާފައިވެއެވެ. މި ޖީން ނެތް މީހުންނަށް ބައިސްކަލް ދުއްވުމުގެ ސަބަބުން ވަރަށް ބޮޑު ފައިދާއެއް ލިބޭ ކަމަށް ފެނިފައިވެއެވެ. އެއީ ޑިމެންޝިއާ ޖެހުމުގެ ފުރުސަތު 26 އިންސައްތަ ކުޑަވުމެވެ. މި ޖީން ހުރި މީހުންނަށްވެސް ކޮންމެވެސް ވަރެއްގެ ރައްކާތެރިކަމެއް ލިބިފައިވިޔަސް، ނަތީޖާ އެހާ ވަރުގަދައެއް ނޫން ކަމަށް ދިރާސާ ތަކުން ދައްކައެވެ.
މި ދިރާސާގައި ހިމެނުނު ތަޖުރިބާކާރުން ފާހަގަކުރާ ގޮތުގައި، މި ދިރާސާއިން ވަރުގަދަ ގުޅުމެއް ދައްކާފައިވިޔަސް، ބައިސްކަލު ދުއްވުމަކީ ސީދާ ޑިމެންޝިއާ ދުރުކޮށްދޭ ކަމެއްކަން ސާބިތުކޮށްދީފައެއް ނުވެއެވެ. މި ހޯދުންތައް ބިނާވެފައިވަނީ ކޮންމެވެސް ވަގުތެއްގައި، މީހުން އަމިއްލައަށް ރިޕޯޓުކޮށްފައިވާ ދަތުރުފަތުރުގެ އާދަތަކުގެ މައްޗަށެވެ. ނަމަވެސް، ހަރަކާތްތެރިކަމަކީ ސިކުނޑީގެ ސިއްހަތަށް މުހިންމު ކަމެއްކަން ދައްކުވައިދޭ ކުރީގެ ހެކިތަކަށް މި ނަތީޖާތަކުން ތާއީދު ލިބެއެވެ.
ބައިސްކަލް ދުއްވުމަކީ ހަށިގަނޑާއި ސިކުނޑިވެސް ހަރަކާތްތެރިކުރުވާ ކަމެކެވެ. މިކަމަށް ބެލެންސް، ކޯޑިނޭޝަން، މަގު ދެނެގަތުން އަދި ހަށިގަނޑުގެ ބާރު ބޭނުންވެ އެވެ. މި ކަންކަން އެކުވެގެން، އުމުރުން ދުވަސްވުމުން ސިކުނޑީގެ ހަރަކާތްތެރިކަން ދަށްވުމުން ރައްކާތެރިވުމަށް އެހީތެރިވެދޭނެ އެވެ. މިއީ ހިނގާލުމުން ނުވަތަ ހަރަކާތްތެރި ނޫން ދަތުރުފަތުރުގެ ވަސީލަތްތަކުން ނުލިބޭ ފައިދާއެކެވެ.
އުމުރުން ދުވަސްވުމުން ސިކުނޑި ތޫނުކޮށް ބެހެއްޓުމަށް ގިނަ ބަޔަކު ގިނަ ގޮތްގޮތުން މަސައްކަތްކުރަމުން އަންނައިރު، ދިރާސާ ކުރި ފަރާތްތަކުން ބުނާ ގޮތުގައި، ދިރިއުޅުމުގެ ބައެއްގެ ގޮތުގައި ބައިސްކަލް ދުއްވުމަށް ހިތްވަރުދިނުމަކީ، ސިކުނޑީގެ ދިގު މުއްދަތުގެ ސިއްހަތަށް ފައިދާކުރަނިވި، ފަސޭހަ އަދި އަގުހެޔޮ ސިއްހީ އާންމު ސްޓްރެޓެޖީއަކަށް ވެދާނެ އެވެ.
