މޯލްޑިވްސް ސީފުޑް ޕްރޮސެސާސް އެންޑް އެކްސްޕޯޓާސް އެސޯސިއޭޝަން (އެމްއެސްޕީއީއޭ) އިން މިއަދު ނެރުނު ބަޔާނެއްގައި ބުނީ ސަރުކާރުގެ މަސް ކުންފުނި މިިފްކޯއިން މަސް ގަންނަ އަގު 20.ރ އަށް ބޮޑުކުރަން މަސައްކަތްކުރަމުން އަންނަ ކަމަށް ރައީސް ޑރ. މުހައްމަދު މުއިއްޒު ވިދާޅުވުމުން، އެ ސިނާއަތުގައި ހަރަކާތްތެރިވާ ކުންފުނިތަކުގެ ކަންބޮޑުވުން އެ ޖަމިއްޔާއާ ހިއްސާކޮށްފައިވާ ކަމަށެވެ.
އެމްއެސްޕީއީއޭ އިން ބުނީ މަހުގެ އަގުބޮޑުކޮށްފިނަމަ މަސްވެރިކަމުގެ ސިނާއަތް ދެމެހެއްޓުމަށް ގޮންޖެހުންތައް ކުރިމަތިވެ، ދިވެހި މަސް ބޭރު މާކެޓްތަކަށް ގަނެވޭވަރަށް ވުރެ އަގު ބޮޑުވެ، ސިނާއަތުގައި ހަރަކާތްތެރިވާ އަމިއްލަ ކުންފުނިތައް ބަންގުރޫޓްވެ، އެ ކުންފުނިތަކުގެ ފެކްޓްރީތައް ބަންދުކުރަން ޖެހިދާނެ ކަމަށެވެ.
ސިޔާސީ މަންފާއަށް މަހުގެ އަގުބޮޑުކުރުމުން ބޮޑެތި ގޮންޖެހުންތަކާ ކުރިމަތިލާން ޖެހޭކަން ފާހަގަކޮށް އެމްއެސްޕީއީއޭ އިން ބުނީ 2023 ވަނަ އަހަރުގެ ރިޔާސީ އިންތިހާބާ ދިމާކޮށް މަހުގެ އަގުބޮޑުކުރުމުން ލިބުނު ގެއްލުން އަދިވެސް ފޫނުބެއްދޭ ކަމަށެވެ.
މަސް ކިލޯއެއްގެ އަގު 20ރ.އަށް ކަނޑައަޅައި ދާއިމީ ގޮތެއްގައި އެ އަގުގައި މަސް ގަތުމަށް މަސައްކަތް ކުރަމުން އަންނަ ކަމަށް ރައީސް މުހައްމަދު މުއިއްޒު ވިދާޅުވީ މ. ދިއްގަރު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގަ އެވެ.
އެ ބަދަލު ގެންނާނެ ވަކި ދުވަހެއް ރައީސް ވިދާޅެއްނުވެ އެވެ. އެމަނިކުފާނު ވިދާޅުވީ އެއީ ކުއްލިއަކަށް ގެންނަވާނެ ބަދަލެއް ނޫން ކަމަށާއި އެ ބަދަލު ގެންނަވާނީ ދެމެހެެއްޓެނިވި ގޮތެއްގައި ކަމަށެވެ. އެކަމަށް މިފްކޯއާ އެކު މަޝްވަރާކުރަމުން އަންނަ ކަމަށް ވެސް ރައީސް ވިދާޅުވި އެވެ.
