މަޓާޓޯގެ ސީއީއޯއަކަށް ބައްސާމް ހަމަޖެއްސީ އެ މަގާމަށް ކުރިމަތިލި މީހުންގެ ތެރެއިން އިންޓަވިއު ޕްރޮސެސް ނިންމައި އެންމެ މަތިން މާކްސް ލިބުމުންނެވެ. މަޓާޓޯގެ ސީއީއޯގެ މަގާމު ހުސްވީ އެ މަގާމުގައި ހުންނެވި އާމިނަތު ސޫޒަން އިސްތިއުފާ ދެއްވުމާ ގުޅިގެންނެވެ.
ފަތުރުވެރިކަމާއި ހޮސްޕިޓާލިޓީ ދާއިރާގައި 20 އަހަރުގެ ތަޖުރިބާ ހުރި ބައްސާމް ވަނީ ކުރިން ޓްރެވެލް އެޖެންސީތަކާއި އެއާލައިންތަކުގެ އިތުރުން ޑެސްޓިނޭޝަން މާކެޓިންގައި އިސް ރޯލުތަކެއް އަދާކޮށްފަ އެވެ.
އެމްއެމްޕީއާރްސީގެ ޑެޕިއުޓީ މެނޭޖިން ޑިރެކްޓަރުކަން ވެސް ފުރުއްވާފައިވާ ބައްސާމް މިދިޔަ އަހަރު އެ މަގާމުން ވަކިކުރީ ހަރަދު ކުޑަކުރަން ރައީސް މުހައްމަދު މުއިއްޒު ކަނޑައަޅުއްވާފައިވާ ސިޔާސަތުގެ ތެރެއިން ކަމަށް ބައްސާމް ކުރިން ވިދާޅުވެފައިވެ އެވެ.
