އެމްއެމްއޭއިން ބުނީ މި މުބާރާތް އަމާޒުކޮށްފައިވަނީ ރާއްޖޭގޭ ހުހިރާ ސަރަހައްދެއްގެ ގްރޭޑް 5 އިން 9 އަށް ކިޔަވާ ދަރިވަރުންނަށް ކަމަށާއި އަދި މުބާރާތުގައި، ކުރެހުމުގެ ޒަރީއާއިން މާލީ ދާއިރާ އޮންނާނެގޮތުގެ ތަސައްވަރު ދައްކާލުމުގެ ފުރުސަތު ދަރިވަރުންނަށް ލިބިގެންދާނެ ކަމުގަ އެވެ.
އަދި ކުރެހުމުގެ ތެރެއިން، ދަރިވަރުންގެ އައު ހިޔާލުތަކާއި އައު އިޖާދީ ވިސްނުންތައް ދެނެގަނެ އެ ދަރިވަރުންގެ ހުނަރުތައް އާއްމުންނަށް ހަމައަށް ފޯރުކޮށްދިނުމަކީވެސް މުބާރާތުގެ މަގްސަދެއް ކަމަށާއި މުބާރާތުގެ ބައިވެރިންނަށް އެކި ބާވަތްތަކުގެ އަތު ކުރެހުމާއި ޑިޖިޓަލް ކުރެހުންތައް ނުވަތަ މިކްސް މީޑިއާގެ ބޭނުންކޮށްގެން ވިލުންތެރި މާލީ މުޖުތަމައެއް އޮންނާނެ ގޮތުގެ ތަސައްވުރު ކުރެހުމުގެ ޒަރީއާއިން ހާމަކުރެވޭނެ ކަމަށް އެ އިދާރާއިން ބުނެ އެވެ.
މި ޝޯކޭހުގައި އަށް ތީމެއް ހިމެނެ ކަމަށާއި މި މުބާރާތް ބެހިގެންވަނީ ދެ ގިންތިއަކަށް ކަމަށް އެ އިދާރާއިން ބުނެ އެވެ.
އެއީ ގްރޭޑް 5-7 އާއި ގްރޭޑް 8-9 ކަމަށް ފާހަގަ ކުރަމުން އެމްއެމްއޭއިން ބުނީ މީގެ އިތުރުން ޑިޖިޓަލް އަދި ޑިޖިޓަލް ނޫން މަސައްކަތްތަކަށް ވަކިން އިނާމު ދެވޭނެ ކަމަށެވެ.
މި މުބާރާތުގެ ވަނަތަކަށް 3،000 ރުފިޔާއާ ހަމައަށް ފައިސާގެ އިނާމު ލިބޭނެކަމަށާއި އިސްލާމީ ފައިނޭންސް އިން ދާއިރާއަށް ހާއްސަވާ އެންމެ ރަނގަޅު މަސައްކަތަށް 500 ރުފިޔާގެ ހާއްސަ އިނާމެއް ދެވޭނެ ކަމަށް އެ އިދާރާއިން މައުލޫމާތުދެ އެވެ.
އަދި ހޮވޭ މަސައްކަތްތައް އެމްއެމްއޭގެ އިވެންޓްތަކުގައި ދައްކައި، އަދި އެ އިދާރާއިން ހޭލުންތެރިކަން އިތުރުކުރުމުގެ ކެމްޕެއިންތަކުގައި ބޭނުންކުރެވިގެންދާނެ ކަމަށް އެ އިދާރާއިން ފާހަގަ ކުރެ އެވެ.
ދަރިވަރުންނަށް އެމީހުންގެ މަސައްކަތް ޑިޖިޓަލްކޮށް ނުވަތަ ފިޒިކަލްކޮށްވެސް ހުށަހެޅިދާނެ ކަމަށާއި މުބާރާތުގެ ސުންގަޑިއަކީ 9 އޮކްޓޯބަރު 2025 ވާ ދުވަހުގެ މެންދުރު ފަހު 3:00 ކަމަށް އެ އިދާރާއިން ބުނެ އެވެ.
އެމްއެމްއޭއިން ބުނެފައިވާ ގޮތުގައި ހުށަހަޅާ މަސައްކަތްތަކަކީ އަމިއްލަ އުފެއްދުންތަކަށް ވާންޖެހޭނެކަމަށާއި އަދި އާރޓިފިޝަލް އިންޓަލިޖެންސް - އޭއައި މެދުވެރިކޮށް އުފައްދާފައިވާ ނުވަތަ ކޮޕީކޮށްފައިވާ އެއްޗެއް ކަމުގައި ނުވުން ލާޒިމް ކަމުގަ އެވެ.
މި މުބާރާތާއި ގުޅޭ އެންމެ ފަހުގެ މައުލޫމާތު އެމްއެމްއޭގެ ވެބްސައިޓުން އަދި ސޯޝަލް މީޑިއާގެ މަންސަތަކުން ލިބެން ހުންނާނެ ކަމަށް އެ އިދާރާއިން ބުނެ އެވެ
