އެމަނިކުފާނު މިގޮތަށް ވިދާޅުވީ، ޓެކްސް ޓްރައިބިއުނަލް އަށް ސުޕްރީމް ކޯޓުގެ ކުރީގެ ފަނޑިޔާރު މަހާޒް އަލީ ޒާހިރު އައްޔަން ކުރަން މަޖިލީހަށް ނަން ފޮނުއްވާފައިވާތީ، އެކަމާ ގުޅޭ ގޮތުން ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ދެއްކެވި ވާހަކައަށް ރައްދު ދެއްވަމުންނެވެ.
ސަރުކާރުގެ ނުފޫޒު އޮންނަ ޖުޑީޝަލް ސާވިސް ކޮމިޝަން (ޖޭއެސްސީ)ން މަހާޒު ހިމެނޭހެން ދެ ފަނޑިޔާރަކު ވަކިކުރަން ނިންމީ މިދިޔަ މެއި މަހު އެވެ.
މީކާއިލް ވިދާޅުވީ އިތުބާރު ނެތިގެން މަޖިލީހުން ވަކިކުރި ފަނޑިޔާރަކު ޓެކްސް ޓްރައިބިއުނަލް އައްޔަން ކުރަން މި ސަރުކާރުން ލިސްޓުގެ ކުރީގައި ހިމަނުއްވައި ފޮނުއްވުމުން ސުވާލު އުފެދޭ ކަމަށެވެ.
މީކާއީލްގެ ވާހަކައަށް ފަހު، އެހެން މެންބަރަކަށް ފުރުސަތުދެއްވުމުގެ ކުރިން، މަހާޒްގެ ނަން ސަރުކާރުން މަޖިލީހަށް ފޮނުވި ސަބަބު ދިފާއުކުރައްވައި، އަބްދުއްރަހީމް ވިދާޅުވީ ދުނިޔެ ހިނގަމުންދާ އިރު އެކި ދުވަހު އެކި ގޮތަށް ކަން ހިނގުމަކީ ދުނިޔަވީ ގާނޫނު ކަން ހަނދާން ކޮށްދެެއްވާ ކަމަށެވެ.
މަޖިލީހުގައި ބަހުސްކުރައްވާއިރު މައުޟޫއަށް ވާހަކަ ދެއްކެވުމަށް ވެސް އަބްދުއްރަހީމް މީކާއިލް އަށް ނަސޭހަތްތެރިވެވަޑައިގަތެވެ.
މަހާޒުގެ އިތުރުން ޑރ. އަޒްމިރަލްދާ ޒާހިރު ސުޕްރީމް ކޯޓުގެ ފަނޑިޔާރުކަމުން ވަކިކުރީ އަޒްމިރަލްދާގެ ފިރިކަލުން ޑރ. އިސްމާއިލް ލަތީފް ބަންދުން ދޫކޮށްލަން ދަށު ކޯޓުގެ ގާޒީންނަށް އެ ދެ ފަނޑިޔާރުން ނުފޫޒު ފޯރުވި ކަމަށް ބުނާ މައްސަލައެއްގަ އެވެ.
މަޖިލިހުގައި ނެގި ވޯޓަށް ފަހު، މަހާޒު ވިދާޅުވެފައި ވަނީ ސުޕްރީމް ކޯޓުގައި މަސައްކަތް ކުރެއްވިއިރު، އެއްވެސް ނުފޫޒަކަށް ތަބާނުވެ މަސައްކަތް ކުރެއްވުނީތީ އުފާ ކުރައްވާ ކަމަށެވެ.
ސުޕްރީމް ކޯޓުގައި ކުރެއްވުނު މަސައްކަތްތަކާ މެދު ހިތްހަމަޖެހޭ ކަމަށާއި އަދި އެ މުއްދަތުގައި އެ ކޯޓުގެ އެތެރެއިންނާއި ބޭރުން އައި އެއްވެސް ނުފޫޒަކަށް ތަބާނުވެ މަސައްކަތް ކުރެއްވުނީތީ އުފާ ކުރައްވާ ކަމަށް މަހާޒު ވިދާޅުވި އެވެ.
