ލާމަރުކަޒީ ގާނޫނަށް ގެނައި އިސްލާހަކާ ގުޅިގެން ކައުންސިލްތަކަށް މުވައްޒަފުން ނެގުން ގާތްގަނޑަކަށް ދެ މަސް ދުވަހަށް ހުއްޓިފައި އޮތުމަށް ފަހު، އެކަން ހައްލުކޮށްދޭ އުސޫލު ލޯކަލް ގަވަމަންޓް އޮތޯރިޓީ (އެލްޖީއޭ) އިން ގެޒެޓުކޮށްފިއެވެ. މި އުސޫލު ގެޒެޓުކުރުމާއެކު، ރަށްރަށުގެ ކަންކަން ހުއްޓުމަކަށް އައިސްފައި އޮތުމަށް ފަހު ކައުންސިލްތަކަށް އަލުން މުވައްޒަފުން ނެގުމުގެ މަގު ވަނީ ފަހިވެފައެވެ.
މިދިޔަ އޮގަސްޓު މަހުގެ 18 ވަނަ ދުވަހު އަމަލުކުރަން ފެށި ލާމަރުކަޒީ ގާނޫނުގެ އިސްލާހުގައި ވަނީ، ކައުންސިލްތަކުގެ ދައުރު ހަމަވާ ފަހު އަހަރު މުވައްޒަފުން ނެގުމާއި ބިން ކުއްޔަށް ދިނުން ފަދަ ބައެއް ކަންކަން ހުއްޓާލަން ޖެހޭނެ ކަމަށެވެ. ނަމަވެސް، އެކަންކަން ކުރެވޭނެ ގޮތުގެ އުސޫލެއް 30 ދުވަސް ތެރޭ ގެޒެޓުކުރަން ޖެހުނު ނަމަވެސް، އެކަން ލަސްވުމުގެ ސަބަބުން ގިނަ ކައުންސިލްތަކެއްގެ މަސައްކަތްތައް ހުއްޓި، ބޮޑެތި ދަތިތަކާ ކުރިމަތިވިއެވެ. ބައެއް ކައުންސިލްތަކުގެ ރައީސުން ވިދާޅުވި ގޮތުގައި މިސްކިތްތަކަށް ބޭނުންވާ މުވައްޒަފުންނާއި ކުނި މެނޭޖްކުރާ މަރުކަޒުތަކަށް މުވައްޒަފުން ނުނެގި، ރައްޔިތުންނަށް ދޭންޖެހޭ ހިދުމަތްތަކަށް ވަނީ ބުރުއަރާފައެވެ.
އެލްޖީއޭއިން އިއްޔެ ގެޒެޓުކުރި އާ އުސޫލާއެކު ކައުންސިލްތައް ތާށިވެފައި އޮތް އޮތުމަށް ވަނީ ހައްލެއް ލިބިފައެވެ. މި އުސޫލުގައި، ކައުންސިލްގެ ދައުރުގެ ފަހު އަހަރު މުވައްޒަފުން ނަގާނެ ގޮތާއި، ކައުންސިލްގެ ބެލުމުގެ ދަށުގައިވާ ބިންތަކާއި ފަޅުތައް ކުއްޔަށް ދޫކުރުމުގައި އަމަލުކުރާނެ ހަމަތައް ވަނީ ބަޔާންކޮށްފައެވެ. މީގެ އިތުރުން، ތަރައްގީގެ ޕްލޭންގައި ނުހިމެނޭ މަޝްރޫއުތައް ހިންގުމާ ގުޅޭ އުސޫލުތައް ވެސް ކަނޑައަޅާފައި ވުމުން، ހުއްޓިފައި ހުރި ގިނަ މަސައްކަތްތަކެއް އަލުން ފެށުމުގެ ފުރުސަތު ކައުންސިލްތަކަށް މިހާރު ލިބިގެންދާނެއެވެ.
