ވެރިކަން ކުރާ ޕީއެންސީގެ ސައުދުﷲ އޭނާގެ ރަސްމީ ފޭސްބުކް އެކައުންޓުގައި މިހެން ވިދާޅުވީ، އެންޓި ކޮރަޕްޝަން ކޮމިޝަން (އޭސީސީ) އަށް އެމްޑީޕީގެ ޗެއާޕާސަން ފައްޔާޒު އިސްމާއިލު ހާޒިރުކުރަނީ ސްވިފްޓަށް ދިން ބަދަލުގެ މައްސަލައިގައި ކަމަށް މީޑިއާތަކުން ރިޕޯޓުކުރުމާ ގުޅިގެންނެވެ.
ސްވިފްޓް އިންޖިނިއަރިންގެ ހިއްސާ އޮންނަ ސައުދުﷲ، ވިދާޅުވީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުގައި އެ ކުންފުނިން ކުރިއަށްގެންދިޔަ ހަ މަޝްރޫއަކުން ކުންފުނި ވަކިކުރީ ގާނޫނާއި ގަވައިދާ ޚިލާފަށް ކަމަށެވެ.
އޭނާ ވިދާޅުވީ އެ މައްސަލައިގައި ކުންފުނިން ބޭނުންވަނީ ފައިސާތޯ ނުވަތަ މަޝްރޫއުތައްތޯ، ކުރީގެ ރައީސް އިބްރާހީމް މުހައްމަދު ޞާލިޙްގެ ސަރުކާރުގެ ސެޓުލްމެންޓް ކޮމިޓީން އެހި ކަމަށެވެ.
އޭނާ ވިދާޅުވީ ފައިސާ ދިނުމުގެ ބަދަލުގައި، ކުންފުނިން ނެގި ހަ މަޝްރޫއުގެ ތެރެއިން ހަތަރު މަޝްރޫއެއްގެ އަގަށް ފެތޭ ގޮތަށް ފަސް މަޝްރޫއެއް އެ ސްވިފްޓްއަށް ދިން ކަމަށެވެ.
އޭސީސީން ފޮނުވި އަމުރުގައި އޮތީ، އަންނަ ހޯމަ ދުވަހުގެ ހެނދުނު 9:30 އަށް ފައްޔާޒު އެ އިދާރާއަށް ހާޒިރުވުމަށެވެ.
ހާޒިރުވުމުގެ އަމުރުގައި ބުނެފައިވާ ގޮތުން ފައްޔާޒަށް ތުހުމަތުކުރަނީ 2019 ވަނަ އަހަރު ބޭއްވި ޑިސްޕިއުޓް ރިސޮލިއުޝަން ކޮމެޓީގައި އޭނާ ބައިވެރިވެފައި ވަނީ އެ ކޮމެޓީގެ މެމްބަރެއްގެ ހައިސިއްޔަތުން ލިބިފައިވާ ރަސްމީ ހައިސިއްޔަތު ނަހަމަ ގޮތުގައި ބޭނުންކޮށްގެން، ސްވިފްޓް އިންޖިނިއަރިން ކުންފުންޏަށް އެކަށީގެން ނުވާ ބަދަލެއް ދީ، އެ ކުންފުންޏަށް ލިބެން ނުޖެހޭ މަންފާއެއް ހޯދައިދިނުމަށް ކަމަށެވެ.
ޗިޓު ލިބުމުން ފައްޔާޒު އެކްސްގައި ކުރެއްވި ޕޯސްޓެއްގައި ވިދާޅުވީ، ރަސްމީ ހައިސިއްޔަތު ނަހަމަ ގޮތުގައި ބޭނުންކޮށް ދައުލަތަށް ގެއްލުން ލިބޭ ގޮތަށް އަމަލުކޮށްފައެއް ނޯންނާނެ ކަމަށެވެ. އަދި، އިންސާފުވެރި ތަހުގީގެއް އޭސީސީން ކުރާނެ އަދި ކުރެވޭނެ ކަމަށް މިއަދު ގަބޫލެއް ނުކުރާ ކަމަށް ލިޔުއްވާފައިވެ އެވެ.
