އެމްޑީޕީގެ ބޯހިޔާވަހިކަމުގެ ކޮމިޓީން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އަކްރަމް ކަމާލުއްދީން ވިދާޅުވީ މީގެ ކުރިން ބޯހިޔާވަހިކަމުގެ މަޝްރޫއުތަކުން އަނބިމީހާ ނުވަތަ ފިރިމީހާ އަށް ފްލެޓް ލިބިފައިވާ 976 މީހަކު އެމްޑީޕީ ސަރުކާރުން އިއުލާނުކުރި ފްލެޓް ލިސްޓުގައި ހިމެނޭ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ދައްކަވާފައިވާ ވާހަކަތަކީ ކަނޑައެޅިގެން ދޮގެއްކަމަށެވެ.
އަކްރަމް ވިދާޅުވީ އެމްޑީޕީގެ ސަރުކާރުގައި ހިންގާފައިވާ ބޯހިޔާވަހިކަމުގެ މަޝްރޫއުގެ ދަށުން އެއްވެސް ދެމަފިރިއަކަށް އެކުގައި ފްލެޓު ދީފައިނުވާނެ ކަމަށެވެ.
އަނބިމީހާއަށް ނުވަތަ ފިރިމީހާއަށް ކުރިން ފްލެޓް ލިބިފައިވާނަމަ، އެ މީހުންނަށް ފްލެޓް ދޭން އެއްބަސްވުމެއް ހަދާފައިނުވާނެކަމަށާއި ފްލެޓަށް އެދި އަނބިމީހާ އާއި ފިރިމީހާވެސް ވަކިން ފޯމު ހުށަހަޅާފައިވާ ނަމަ، އެ ދެމަފިރިންނަށް އެލޮކޭޓްކޮށްފައި ވާނީ އެއް ފްލެޓެއްކަމަށްވެސް އަކްރަމް ވިދާޅުވިއެވެ. އަދި އެ އުސޫލުގެ ދަށުން ދެމަފިރިން ކުރެ އެކަކަށް ފްލެޓް ކަނޑައެޅުމަށްފަހު، އެއާ މެދު ދެމަފިރިން ގޮތެއް ނިންމަންދެން ފްލެޓް ހުންނާނީ ހޯލްޑްކޮށްފައިކަންވެސް އަކްރަމް ފާހަގަކުރެއްވިއެވެ.
ގެދޮރުވެރިޔާ ސްކީމަށް ކުރިމަތިލީ ފަރާތްތަކުގެ ތެރެއިން 76 ޕޮއިންޓު ލިބިފައި ތިބި ބަޔަކަށް ފްލެޓު ނުދީ 75 ޕޮއިންޓު ލިބިފައި ތިބި ބަޔަކަށް މިދިޔަ ސަރުކާރުން ފްލެޓު ދިން ކަމަށް ބުނެ ހައުސިން މިނިސްޓަރު، އަބްދުالله މުއްތަލިބު ދެއްކެވި ވާހަކަތައްވެސް އަކްރަމް ވަނީ ދޮގުކުރައްވާފައެެވެ. އަކްރަމް ވިދާޅުވީ އެއީ އަނބިމިހާ އަދި ފިރިމިހާއަށް ފްލެޓް ލިބިފައިވާތީ ހޯލްޑުކޮށްފައިވާ ފްލެޓްތައްކަމަށެވެ.
އަކްރަމް ވިދާޅުވީ ފްލެޓްކަން ކަން ރަނގަޅަށް ގެންދިޔުމަށް ފްލެޓު ލިބޭ މީހުން ހޮވުމާއި ގުރުނެގުން ފަދަ މަސައްކަތްތައް ކުރިއަށް ގެންދިޔައީ ސިވިލް ސާވިސް މުވައްޒަފުން ބައިވެރިކޮށްގެންކަމަށެވެެ. އެހެންނަމަވެސް މި ސަރުކާރުން ވެރިކަމަށް އައުމަށްފަހު އެކަމުގައި މަސައްކަތް ކުރި ސިވިލް ސާވިސް މުވައްޒަފުންނަކީވެސް އެމްޑީޕީ ސަރުކާރަށް ބައިއަތު ހިފައިގެން ތިބި ބައެއް ކަމަށް ތުހުމަތުކޮށް އެ މުވައްޒަފުން މަސައްކަތުން ދުރުކޮށްފައިވާކަމަށްވެސް އަކްރަމް ވިދާޅުވިއެވެ.
