އައްޑޫ ސިޓީ ކައުންސިލް އޮންނަންވީ ގޮތާ ގުޅޭ ގޮތުން ނަގާ ވޯޓަކީ، ފެންނަ ނުފެންނަ ވޯޓު ނެގުމާ ގުޅޭ ގޮތުން ހަދާފައިވާ އާ ގާނޫނުގެ ދަށުން ނަގާ ފުރަތަމަ ވޯޓަށް ވާނެ އެވެ.
އައްޑު އަތޮޅު އެއް ސިޓީ ކައުންސިލަކުން ހިންގުމުގެ ބަދަލުގައި ވަކިވަކި ކައުންސިލްތައް ހަދައިގެން "އައްޑޫ ރުޅާލަން" ރައީސް މުހައްމަދު މުއިއްޒު އުޅުއްވަނީ އައްޑޫއަށް އެ މަނިކުފާނު ވެވަޑައިގެންނެވި ވައުދުތައް ނުފުއްދޭނެކަން ޔަގީންވުމުން ކަމަށް އައްޑޫގެ މޭޔަރު އަލީ ނިޒާރު ވަނީ ވިދާޅުވެފަ އެވެ.
ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތުގައި އެ ވޯޓުގައި އަހާނީ އައްޑޫގައި ވަކިވަކި ކައުންސިލެއް އޮންނަން ބޭނުންތޯ ނުވަތަ މިހާރުގެ ގޮތަށް އައްޑޫ ސިޓީ ކައުންސިލް ގޮތަށް ކުރިއަށް ގެންދާނީތޯ އެވެ. މިކަމުގައި ސަރުކާރުގެ ވަކި ސްޓޭންޑެއް ނެތް ކަމަށް ރައީސް ވަނީ ވިދާޅުވެފަ އެވެ.
ޓްރާންސްޕޭރެންސީ މޯލްޑިވްސް، ޕްރޮޓެކްޓް ތިމާވެށި، މޯލްޑިވްސް ލޯކަލް ކައުންސިލް އެސޯސިއޭޝަން އަދި ޒީރޯ ވޭސްޓް މޯލްޑިވްސް ގުޅިގެން ނެރުނު ނޫސް ބަޔާނެއްގައި ބުނީ އައްޑޫ އާންމު ވޯޓަށް އެކަށީގެންވާ ވަގުތު ނުދިނުމުން، ވޯޓު ނެގުމުގެ އިންސާފުވެރިކަމާއި، ހާމަކަން ބޮޑުގޮތެއްގައި ކުރިއަށް ގެންދިޔުމާއި، އަދި ޑިމޮކްރެޓިކް އުސޫލުތަކާ އެއްގޮތަށް ހުރިހާ އެންމެންގެ ބައިވެރިވުން ހޯދުމާ ގުޅޭގޮތުން ކަންބޮޑުވާ ކަމަށެވެ.
މީގެއިތުރުން ހަމައެކަނި އައްޑު އާއި މާލޭގައި ވޯޓު ފޮށި ބަހައްޓަން ނިންމާފައި އޮތުމުގެ ސަބަބުން، އެހެން އަތޮޅުތަކާއި ރިސޯޓުތަކާއި ބޭރު ގައުމުތަކުގައި ދިރިއުޅޭ ގިނަ ބަޔަކަށް ވޯޓުލުމުގެ ފުރުސަތު ނުލިބި، ވޯޓުލާ އާބާދީގެ ގިނަ ބަޔަކު ވޯޓުލުމުގެ މަރުހަލާއިން ބާކީވެގެންދާނެކަން ބަޔާނުގައި ފާހަގަކޮށްފައިވެ އެވެ.
ޖަމިއްޔާތަކުގެ ބަޔާނުގައި ވަނީ އާންމު ދިރިއުޅުމަށް އަސަރުކުރާ ނިންމުންތަކުގައި ބައިވެރިވެ ވޯޓުލުމުގެ ހައްގަކީ ޑިމޮކްރެސީގެ އަސާސީ އުސޫލުތަކެއް ކަމަށާއި އަދި މި އަސާސްތައް ދެމެހެއްޓުމަށްޓަކައި ރައްޔިތުންނަށް އެކަށީގެންވާ ވަގުތުދީ، މައުލޫމާތު ލިބޭނެގޮތް މަގުފަހިކޮށްދީ، މާނަހުރި ގޮތެއްގައި ބައިވެރިވުމަށް ހަމަހަމަ ފުރުސަތެއް ދޭންވާނެ ކަމަށްވެސް ބުނެފަ އެވެ. އަދި މި ކަންކަން ކަށަވަރު ނުކުރެވޭނަމަ މި ވޯޓުގެ ސައްހަކަމަށް ބުރޫއެރުމުގެ ޖާގަ އެބައޮތް ކަމަށްވެސް ބުނެފައިވެ އެވެ.
މި މަހު 25، ގައި ނަގާ މި ވޯޓުގައި ފުރަތަމަ ހިމެނުނު ހުޅުދޫ އާއި މީދޫ އެއް ކައުންސިލެއްގެ ދަށުން ހިންގަން ފެނޭތޯ އޮތް ސުވާލު ރައީސް މުހައްމަދު މުއިއްޒު މިހާރު ވަނީ އުނިކުރައްވައިފަ އެވެ. އެހެންކަމުން މި ވޯޓުގައި ދެން ހިމެނޭނީ ހުޅުދޫ އަދި މީދޫގައި ވަކި ކައުންސިލްތަކެއް ގާއިމު ކުރުމަށް ފެނޭތޯ އާއި ފޭދޫގައި ވަކި ކައުންސިލެއް ގާއިމު ކުރުމާ ބެހޭ ސުވާލުތައް އެކަންޏެވެ.
އިލެކްޝަންސް ކޮމިޝަނުން ބުނީ އައްޑޫ އާންމު ވޯޓުގައި 11 ވޯޓު ފޮށްޓެއް އައްޑޫގައި ބަހައްޓާއިރު، ހަތް ވޯޓު ފޮށްޓެއް މާލޭގައި ބަހައްޓާނެ ކަމަށެވެ. މާލޭގައި ވޯޓު ފޮށިތައް ބަހައްޓަނީ ކަލާފާނު ސްކޫލުގަ އެވެ.
އީސީން ބުނީ، ވޯޓުލާން ދާންޖެހޭ ތަން VR (Space) NID No ޖެއްސެވުމަށް ފަހު 1414 އެސްއެމްއެސް ފޮނުއްވައިގެން ނުވަތަ ކޮމިޝަންގެ ވެބްސައިޓު މެދުވެރިކޮށް ބެލޭނެ ކަމަށެވެ.
