ފޯރިގަދަ ކުޅުމެއް ފެނިގެންދިޔަ މި މެޗު އިންފަންޓީނޯގެ ޓީމު ކާމިޔާބުކުރީ 6-4 ގެ ނަތީޖާއަކުންނެވެ.
މި ހާއްސަ ފުޓުބޯޅަ ފެސްޓިވަލްގައި ކުޅުނު މެޗުގައި ދެ ޓީމުގެ ކެޕްޓަނުންގެ ގޮތުގައި ފެނިގެންދިޔައީ ރައީސް މުއިއްޒު އާއި ފީފާގެ ރައީސް އިންފަންޓީނޯއެވެ. މީގެ އިތުރުން ނައިބު ރައީސް ހުސައިން މުހައްމަދު ލަތީފް، މިނިސްޓަރުން، އަދި ސަރުކާރުގެ އިސް ބޭފުޅުން މި މެޗުގައި ބައިވެރިވެވަޑައިގެންނެވިއެވެ. އަދި އިޓަލީއަށް ވޯލްޑް ކަޕް ކާމިޔާބުކޮށްދިން މަޝްހޫރު ޑިފެންޑަރު މާކޯ މަޓެރާޒީ އާއި ރާއްޖޭގެ ފުޓުބޯޅައިގެ ލެޖެންޑުން ވެސް މި މެޗުގައި ކުޅެފައިވެއެވެ.
ފީފާގެ ރައީސް އިންފަންޓީނޯ ރާއްޖެއަށް މި ޒިޔާރަތް ކުރެއްވީ ފުޓުބޯޅަ އެސޯސިއޭޝަން އޮފް މޯލްޑިވްސްގެ ރައީސް އަހުމަދު ތޯރިގުގެ ހާއްސަ ދައުވަތަކަށެވެ. މި ޒިޔާރަތުގެ ތެރެއިން ގައުމީ ދަނޑުގައި ކުރިއަށްގެންދިޔަ މި ފެސްޓިވަލަކީ ރާއްޖޭގެ ފުޓުބޯޅައަށް އިތުރު ފޯރިއެއް ގެނެސްދިން ހަރަކާތެއްކަން ފާހަގަކޮށްލެވެއެވެ.
