12 ޒޯނަކަށް ބަހާލައިގެން ކުރިއަށްގެންދިއުމަށް ހަމަޖެހިފައިވާ މި ޕްރޮގްރާމަކީ، އެޗްޑީސީގެ އިތުރުން، މޯލްޑިވްސް ފުޑް އެންޑް ޑްރަގް އޮތޯރިޓީއާއި ހުޅުމާލެ ޕޮލިސް ގުޅިގެން ކުރިއަށްގެންދާ ޕްރޮގްރާމެކެވެ.
އެޗްޑީސީން ބުނީ، މި ޕްރޮގްރާމްގައި އެކުންފުނީގެ 50 އެއްހާ މުވައްޒަފުން ބައިވެރިވާނެކަމަށެވެ. އަދި އަމާޒަކީ އަންނަ ޖެނުއަރީމަހުގެ ނިޔަލަށް ހުޅުމާލެ ފޭސް 1 ގައި މި ޕްރޮގްރާމް ކުރިއަށްގެންގޮސް ނިންމާލުންކަަމަށެވެ.
މި ޕްރޮގްރާމް ފެށުމަށްޓަކައި ބޭއްވި ރަސްމިއްޔާތުގައި ވާހަކަދައްކަވަމުން ހައުސިން ޑިވެލޮޕްމެންޓް ކޯޕަރޭޭޝަން އެޗްޑީސީގެ މެނޭޖިން ޑިރެކްޓަރު އަލީ ޒުހައިރު ވިދާޅުވީ، ހުޅުމާލެއަކީ ސާފު ރީތި، ދިރިއުޅެން ފަސޭހަތަނަކަށް ހެދުމަށް އެންމެންގެ އެއްބާރުލުން މުހިންމުކަމަށެވެ. އަދި މިއީ އެޗްޑީސީން އެކަނި ކުރެވޭނެ މަސައްކަތެއް ނޫންކަމަށާއި، މި މަސައްކަތުގައި ހުޅުމާލޭ ދިރިއުޅޭ ރައްޔިތުންގެ އެއްބާރުލުން މުހިންމުކަމަށް ޒުހައިރު ވިދާޅުވި އެވެ.
އެޗްޑީސީން ކުރިއަށްގެންދާ "ހިތްފަސޭހަ ހުޅުމާލެ" ކެމްޕެއިންގެ ދަށުން މި މަސައްކަތުގެ އިތުރަށް ވެސް އެހެން ގިނަ މަސައްކަތްތަކެއް ކުރިއަށް ގެންދާނެކަމަށް އެ ކުންފުނިން އަންނަނީ ބުންނަމުން ނެވެ.
