ރާއްޖެއަށް ވަގަށް ސިނގިރެޓް އެތެރެކުރި މައްސަލަތަކާ ގުޅިގެން ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީން (241 ކޮމިޓީ) ހުށަހެޅި ރިކޮމެންޑޭޝަންތައް ރައީސް ޑރ. މުހައްމަދު މުއިއްޒު ތަންފީޒު ކުރައްވަން ފައްޓަވާފައިވާތީ، މަޖިލީހުގެ ނައިބު ރައީސް އަހުމަދު ނާޒިމް އެކަމަށް ޝުކުރު އަދާކުރައްވައިފި އެވެ.
Advertisement
ވަގަށް ސިނގިރޭޓު އެތެރެކުރި މައްސަލާގެ ތުހުމަތުގައި ކަސްޓަމްސްގެ ދެ ޑެޕިއުޓީ ކޮމިޝަނަރުން ކަމަށްވާ މަހްމޫދު ރިޔާޒާއި އަބްދުﷲ ވަހީދު މިއަދު ވަނީ މަގާމުން ވަކިކޮށްފަ އެވެ.
އެ ދެ ބޭފުޅުން ވަކިކުރީ "ދަ ހޯކްސް ޕްރައިވެޓް ލިމިޓެޑް" ގެ ތެޔޮ ބޯޓެއްގައި ވަގަށް ސިނގިރޭޓް އެތެރެކުރި މައްސަލަ އާއި ބޮންޑެޑް ވެއާހައުސްއެއްގައި ހުރި ސިނގިރޭޓްތަކެއް ވަގަށް އެތަނުން ނެރުނު މައްސަލައާ ގުޅިގެން، މަޖިލީހުގެ ކޮމެޓީން ދީފައިވާ ލަފައަށް ރިއާޔަތްކޮށް ކަމަށް ރައީސް ސޯޝަލް މީޑިއާގައި ކުރެއްވި ޕޯސްޓެއްގައިވެ އެވެ.
މާލިއްޔަތު ކޮމިޓީގައި ވާހަކަދައްކަވަމުން ނާޒިމް މިއަދު ވިދާޅުވީ، ހޯމަ ދުވަހު މަޖިލީހުން ފާސްކުރި ރިޕޯޓު ފޮނުވުމުން، އެ ކަންކަން ތަންފީޒުވާތަން ފެނުމަކީ އުންމީދު އާވާ ކަމެއް ކަމަށެވެ. އޭނާ ވިދާޅުވި ގޮތުގައި ސަލާމަތީ ހިދުމަތްތަކާ ބެހޭ ކޮމިޓީން ތައްޔާރުކުރި އެ ރިޕޯޓުގައި ހިމެނޭ ސިއްރު ޗެޕްޓަރު ފޮނުވީ ސީދާ ރައީސް މުއިއްޒަށް އެކަންޏެވެ
"މީގެ ދެ ދުވަހެއް ކުރިން އަޅުގަނޑުމެން މަޖިލީހުން ފާސްކޮށްފައި ފޮނުވި 241 ކޮމިޓީގެ ރިޕޯޓްގެ ކަންތައްތައް ތަންފީޒުވަމުންދާ ތަން އަޅުގަނޑުމެންނަށް މިއޮތީ ފެނިފައި. އެ ރިޕޯޓްގައި އޮންނާނެ ސިއްރު ޗެޕްޓާއެއް. ޗެޕްޓާ ހައެއް. ނިންމުން ހައެއް. އަޅުގަނޑުމެން ފޮނުވީ ސީދާ ރައީސުލްޖުމްހޫރިއްޔާއަަށް. ރައީސުލްޖުމްހޫރިއްޔާ މިއަދު މިވަނީ ކަސްޓަމްސްގެ، ރައީސުލްޖުމްހޫރިއްޔާއަށް ވަކި ކުރެއްވެން އޮތް ބޭފުޅުން ގާނޫނާ އެއްގޮތަށް ވަކިކުރައްވާފައި،" ނާޒިމް ވިދާޅުވި އެވެ.
އޭނާ ވިދާޅުވި ގޮތުގައި އެއީ މަޖިލީހަށް އޮތް ވަރަށް އުފާވެރި ހަބަރެކެެވެ. މަޖިލީހުގެ ކޮމިޓީތަކުން އެފަދަ މައްސަލަތަކުގައި ނިންމާ ނިންމުންތައް ރައީސް ތަންފީޒު ކުރައްވާނެކަން މިހާރު އެނގޭ ކަމަށް ވެސް ނާޒިމް ވިދާޅުވި އެވެ.
ކަސްޓަމްސްގައި 30 އަހަރު ހިދުމަތްކޮށްފައިވާ މަހުމޫދު، ޑެޕިއުޓީއަކަށް އައްޔަން ކުރެއްވީ ކުރީގެ ސަރުކާރުގައި ޖޫން، 2020 ގަ އެވެ. އަދި އަބްދުﷲ ވަހީދު އެ މަގާމަށް އައްޔަން ކުރެއްވީ މި ސަރުކާރުން، ޖެނުއަރީ 2024 ގަ އެވެ.
ރާއްޖޭގައި ފުޅާ ދާއިރާއެއްގައި ތެލުގެ ވިޔަފާރިކުރާ ކުންފުންޏެއް ކަމަށްވާ ދަ ހޯކްސްގެ ބޯޓެއްގައި ގަވައިދާ ހިލާފަށް ސިނގިރޭޓު އެތެރެކުރި މައްސަލަ ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމެޓީ (241 ކޮމެޓީ)ން ވަނީ ދިރާސާކޮށްފަ އެވެ.
އެ މައްސަލަ ދިރާސާކޮށް ނިންމި ގޮތުގެ ރިޕޯޓު މަޖިލީހުން މިދިޔަ ހޯމަ ދުވަހު ވަނީ ފާސްކޮށްފަ އެވެ. އެ ރިޕޯޓުގައި، ކަންތައްތައް އިސްލާހު ކުރުމަށް ފުލުހުންނަށާއި ކަސްޓަމްސްއަށް އަދި ހޯމްލޭންޑް ސެކިއުރިޓީ މިނިސްޓްރީން ފިޔަވަޅުތައް އެޅުމަށް ވަނީ އަންގައިފަ އެވެ.
