ޕީޕަލްސް ނެޝަނަލް ފްރޮންޓު (ޕީއެންއެފް)ގެ ފުރަތަމަ ގައުމީ ޖަލްސާގައި ވާހަކަ ދައްކަމުން ރައީސް ޔާމީން ވިދާޅުވީ އެމްޑީޕީއިން ފުރަތަމަ ވެރިކަމަށް އައީވެސް ފަނޑިޔާރުގެތައް މިނިވަންކުރަން ވަކާލާތުކޮށްގެން ނަމަވެސް އެ ވެރިކަމުގައި ވެސް ކަން ވެގެން ދިޔައީ ހިތްޕުޅާ ނުވި ބޭފުޅުން ޖަލުގައި ގަނަ ތެޅުވުން ކަމަށާއި އެގޮތުން އޭރު އެމަނިކުފާނު ވެސް ޖަލުގައި ދުވަސްތަކެއް ހޭދަ ކުރައްވަން ޖެހިވަޑައިގެންނެވި ކަމަށެވެ.
ކޯޓުގައި އޮތް މައްސަލަތަކަށް ނުފޫޒު ފޯރުވައި ސަރުކާރުން ޖަލަށް ލުމަށް މަސައްކަތް ކުރަމުންދިޔަ ނަމަވެސް އެކަން ކާމިޔާބު ނުވާނެ ކަމަށް ޔާމީން ވިދާޅުވި އެވެ.
ވެރިކަން ހިންގުމުގެ މުޅި ނިޒާމު، "ސަރުކާރުގެ މުށުތެރެއަށް" ލާފައިވާ ކަމަށް ވިދާޅުވެ، ރައްޔިތުންގެ މަޖިލީހަށާއި މިނިވަން މުއައްސަސާތަކުގެ އިތުރަށް މީޑިއާތަކަށް ވެސް ޔާމީންގެ ވާހަކަފުޅުގައި ވަރަށް ބޮޑަށް ފާޑުވިދާޅުވި އެވެ.
ޔާމީން ވިދާޅުވި ގޮތުގައި، ޕީއެންއެފް އުފެދިގެން މި ދިޔައީ، ސިޔާސީ ވެރިން ފެއިލުވެ، ރައްޔިތުންގެ ހައްގުގައި ބަހެއް ބުނަން ވެސް ނުކުޅެދިފައި ތިބި ވަގުތެއްގަ އެވެ.
ރައީސް މުއިއްޒު ވެރިކަމަށް ވަޑައިގެންނެވިތާ ހަފުތާއެއް ނުވެ، ޔާމީން ކޯލިޝަންގެ ލީޑަރުކަމުން އިސްތިއުފާދެއްވައި، ޕީއެންއެފް އުފެއްދެވީއެވެ. އެ ޕާޓީ ރަޖިސްޓްރީކުރީ މިދިޔަ އަހަރުގެ މާޗް މަހުގެ 25ވަނަ ދުވަހެވެ.
ޔާމީނާއި އެމަނިކުފާނުގެ އަރިސް ބޭފުޅުން ގެންދަވަނީ ޕީއެންއެފްގެ އޮފީހުގައި ސިލްސިލާކޮށް ހަފުތާއަކު ދެ ދުވަހު ޖަލްސާ ބާއްވައި، އެކި ކަންކަމުގައި މި ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.
