މި މައްސަލަ މަޖިލީހަށް ހުށަހަޅާފައިވަނީ ޗީފް އިންސްޕެކްޓާ އަށްވުރެ މަތީ ރޭންކުތަކުގެ 11 ފުލުހުންގެ ނަމުގައި އެވެ.
އެ ފުލުހުން ފޮނުވި ސިޓީގައި ބުނެފައިވަނީ ފަރުހާދު އާއި ޝިފާންގެ ކިބައިން ފެންނަމުންދާ ބައެއް ކަންކަމުގެ ސަބަބުން ފުލުހުންގެ މުއައްސަސާގެ ހުރުމަތާއި ކަރާމާތަށް ނޭދެވޭ އަސަރު ކުރާ ކަމަށެެވެ.
ޝިފާން އާއި ފަރުހާދު ހިންގާ ކަންކަމުގެ ސަބަބުން ފުލުހުންގެ ޒިންމާ އާއި ވާޖިބުތައް އަދާކުރުމަށް ނުކުޅެދި އެ މުއްސަސާ ފެއިލްވެ ގައުމީ ސަލާމަތަށް ފޫނުބެއްދޭވަރުގެ ގެއްލުން ލިބުން އެކަށީގެންވާ ކަމަށް ވެސް އެ ސިޓީގައި ފާހަގަ ކޮށްފައިވާ ވެ އެވެ
އެ ސިޓީއާއެކު ޝިފާންގެ މައްޗަށް އެތަށް ސީރިއަސް ތުހުމަތުތަކެއް ކޮށްފައިވެ އެވެ.
އެގޮތުން މިސްކޮންޑަކްޓުގެ މައްސަލަތަކަކާއި މަގާމުގެ ނުފޫޒު ބޭނުން ކުރުމުގެ މައްސަލަތަކެއްގެ ވާހަކަ ވަނީ މި ސިޓީގައި ދައްކާފައި އެވެ. މީގެ އިތުރުން އޭނާގެ ދަށުން މަސައްކަތް ކުރަމުން ދިޔަ އަންހެން މުވައްޒިފަކަށް ޖިންސީ ފުރަސާރަ ކުރި ކަމަށް ބުނާ މައްސަލައެއްގެ ވާހަކަ ވެސް މި ސިޓީީގައި ފާހަގަ ކޮށްފައިވެ އެވެ.
ފަރުހާދުގެ މައްޗަށް ކުރެވޭ ސީރިއަސް ތުހުމަތުތަކުގެ ތެރޭގައި ފުލުހުން ތަހުގީގު ކުރަމުންދިޔަ މައްސަލައެއް މަގާމުގެ ނޫފޫޒު ބޭނުންކޮށްގެން ހުއްޓުވުމާއި އޭނާގެ ދަރިފުޅުގެ މައްޗަށް ކުރެވުނު ތުހުމަތަކާ ގުޅޭ ހެކިތައް ފަރުހާދު ނައްތާލި ކަމަށެެވެ
މަޖިލީހުގެ 241 ކޮމިޓީއަށް ފޮނުވާފައިވާ ސިޓީގައި އެދިފައި ވަނީ އެ މައްސަލަތައް ބަލައި ތަހުގީގު ކުރުމަށާއި އެ މައްސަލަތަކުގައި ޝިފާން އާއި ފަރުހާދުގެ މައްޗަށް އެއްވެސް ފިޔަވަޅެއް ނޭޅި އޮތީ ކީއްވެތޯ ބެލުމަށްފަހު އެ ދެމީހުންނަށް ފިޔަވަޅު އަޅައިދިނުމަށެވެ.
