އުތުރު ކޮރެއާގެ ލީޑަރު ކިމް ޖޮންއުންގެ ސިއްހަތު އަދި ހާލުފުޅާއި ބެހޭ ގޮތުން އެތަކެއް ވާހަކަ ދެކެވެމުން ދަނިކޮށް 20 ދުވަހަށްފަހު ފުރަތަމަ ފަހަރަށް އާންމުންގެ ތެރެއަށް ނިކުމެ ވަޑައިގެންފައިވާ ކަމަށް އަލްޖަޒީރާގައި ރިޕޯޓްކުރެ އެވެ.
އެގޮތުން އުތުރު ކޮރެއާގެ ސްޓޭޓް މީޑިއާ ކަމަށްވާ ކޮރެއަން ސެންޓްރަލް ނިއުސް އޭޖެންސީ (ކޭސީއެންއޭ)އާ ހަވާލާދީ އަލްޖަޒީރާގައި ބުނީ ސުންޗޮންގެ ގަސްކާނާ ފެކްޓަރީ އެއް ހުޅުވުމުގެ ރަސްމިއްޔާތެއްގައި ކިމް ބައިވެރިވެވަޑައިގެންފައިވާ ކަމަށެވެ.
އެންމެ ފަހުން ކިމް ފެނިވަޑައިގަތީ މިދިޔަ މަހުގެ 12 ވަނަ ދުވަހު އެވެ. އޭގެ ތިން ދުވަސް ފަހުން އުތުރު ކޮރެއާގެ ކުރީގެ ލީޑަރު އަދި ކިމްގެ ކާފާފުޅު ކިމް އިލް ސަންގްގެ އުފަންދުވަހުގެ ރަސްމިއްޔާތުގައި ކިމް ބައިވެރިވަޑައި ނުގަތުމުން، ކިމްގެ ސިއްހަތާއި ހާލުފުޅާއި މެދު ގިނަ ބަޔަކު ވަނީ ސުވާލު އުފައްދާފައެވެ.
އެހާ މުހިންމު ރަސްމިއްޔާތަކުން ފެނިވަޑައި ނުގަތުމުން، ސޯޝަލް މީޑިއާ ޕްލެޓްފޯމް ތަކުގައި ކިމް މަރުވެފައިވާ ކަމަށް ގިނަ ބަޔަކު ވަނީ ތުހުމަތު ކޮށްފައެވެ.
