އޭނާ މިހެން ވިދާޅުވީ ޕާކިސްތާނުގެ އިސްލާމްއާބާދުގައި ކުރިއަށްދާ އިންޓަ-ޕާލިމެންޓަރީ ސްޕީކާސް ކޮންފަރެންސްގައި ވާހަކަ ދައްކަވަމުންނެވެ. އަބްދުއްރަހީމް ވިދާޅުވީ އަމާން ދުނިޔެއެއް ބިނާކުރެވޭނީ އުއްމީދާއި އިންސާފާއި އިންސާނީ އެއްބައިވަންތަކަމުގެ މައްޗަށް ކަމަށެވެ.
މޫސުމަށް އަންނަ ބަދަލުތަކާއި، ތެދުނޫން މައުލޫމާތު ފެތުރުމާއި، އިގްތިސާދީ އަދި ޖިއޯޕޮލިޓިކަލް ނުތަނަވަސްކަން ފަދަ ކަންކަމަކީ އެއްކަމެއް އަނެއްކަމަކާ ގުޅިފައިވާ މައްސަލަތަކެއްކަން ފާހަގަކުރައްވަމުން، ހާއްސަކޮށް އަންހެނުންނާއި ކުޑަކުދިންނަށް ކުރިމަތިވަމުންދާ ތަކުލީފުތަކާމެދު ކަންބޮޑުވުން ފާޅުކުރެއްވި އެވެ. އަދި ގާނޫނު ހަދާ މަޖިލިސްތަކުގެ އިސްވެރިންނަށް އޯގާތެރިކަމާއި ޒިންމާދާރުކަމާއެކު މަސައްކަތް ކުރުމަށް އިލްތިމާސްކުރެއްވި އެވެ.
ސާކް އަދި އޯއައިސީ ފަދަ ޕްލެޓްފޯމްތަކުގެ ސަބަބުން ރާއްޖެ އާއި ޕާކިސްތާނާ ދެމެދު އޮތް ގުޅުން ބަދަހިވެފައިވާކަން ފާހަގަކުރައްވައި، ޕާލިމެންޓަރީ ޑިޕްލޮމެސީ އިތުރަށް ހަރުދަނާކުރުމަށް އެކުލަވާލާ އިސްލާމްއާބާދު ޑެކްލެރޭޝަނަށް ރާއްޖޭގެ މަޖިލީހުގެ ފުރިހަމަ އެހީތެރިކަން ލިބޭނެ ކަމުގެ ޔަގީންކަން ދެއްވި އެވެ.
