އިދިކޮޅު އެމްޑީޕީން ވަކިވެ އެނބުރި މިދިޔައީ ކުރީގެ ފިކުރަށްކަމަށާއި އެމްޑީޕީން ވަކިވުމުން އުފާވާނެ ބަޔަކު ތިބޭނެކަމަށް މިދިސަ ސަރުކާރުގައި ޔޫމް މިނިސްޓާރުކަން ކުރެއްވި އަހްމަދު މަހްލޫފް ވިދާޅުވެއްޖެއެވެ.
Advertisement
މިދިޔަ ސަރުކާރުގައި ޔޫތް މިނިސްޓަރުކަން ކުރެއްވި މަހްލޫފް އެމްޑީޕީން ވަކިވީ މިދިޔަ ސެޕްޓެމްބަރު މަހު ތެރޭގައެވެ. އެއަށް ފަހު ރޭ އޭނާ ވަނީ ވެރިކަން ކުރާ ޕީއެންސީއާ ގުޅިފައެވެ.
މީ މަހްލޫފް ސޮއިކުރެއްވި ހަތަރު ވަނަ ޕާޓީއެވެ.
މިކަމާއި ގުޅިގެން ކިޔަމުން އަންނަ ފާޑުކިޔުންތަކަށް ރައްދުދީ އެކްސްގައި ކުރެއްވި ދިގު ޕޯސްޓެއްގައި މަހްލޫފް ވިދާޅުވީ މީ އޭނާ ސިޔާސީ ޕާޓީއަކުން ވަކިވި ފުރަތަމަ ފަހަރުކަމަށެވެ. އަދި އަދި އެނބުރި މިދިޔައީ ހަމަ ކުރީގެ ސިޔާސީ ފިކުރުގެ ތެރެއަށް ކަމަށާއި ބަދަލުވެފަ އޮތީ ހަމައެކަނި ޕާޓީގެ ނަންކަމަށެވެ.
" އަޅުގަނޑު ސިޔާސީ މަސައްކަތް ފެށީ 2005 ވަނަ އަހަރު ރައީސް މައުމޫން އުފެއްދެވި DRP އިންނެވެ. އެޕާޓީތެރޭ ހިޔާލު ތަފާތުވެ އަޅުގަނޑުމެންނަށް ހަރުކަށި ފިޔަވަޅު އަޅާ ވަކިކުރި ހިސާބުން، ރައީސް މައުމޫނާއެކު PPM އުފެއްދި އެއް ފައުންޑާ އަކީ އަޅުގަނޑެވެ. ރައީސް ޔާމީން އާއެކު އުފެދުނު ހިޔާލުތަފާތުމުގެ ތެރެއިން 2014 ވަނަ އަހަރު އަޅުގަނޑު PPM އިން ވަކިކުރިއެވެ. " މަހްލޫފް އެކްސްގައި ކުރި ޕޯސްޓުގައިވެއެވެ.
މަހްލޫފް ވިދާޅުވީ 2023 ގެ އިންތިހާބަށް ފަހު އޭނާއާ މެދު ކަންކަން ކޮށްފައިވާ ގޮތުން ފޫހިވިލެެއް ބޮޑުވަރުން ސިޔާސީ ކަންކަމާއި ދުރުގައި ހުރިކަމަށެވެ. އަދި އޭނާ އެމްޑީޕީން ވަކިވުމުން އެޕާޓީގެ މަތި ފަޑީގައި އުފާވާނެ ބަޔަކު ތިބޭނެކަމަށާއި އަދި އެކަމަކު އެވާހަކަތައް ދައްކަން ބޭނުން ނުވާކަމަށެވެ.
" ނަމަވެސް މަތިފަޑީގައި ކަންކަން ހިނގަނީ އެހެނަކުންނޫނެވެ. އަޅުގަނޑު ވަކިވުމުން ވަރަަށް އުފާވާނެ ބަޔަކު މަތިފަޑީގައި ތިބޭނެކަން ކަށަވަރެވެ. އެވާހަކަތައް ދައްކާކަށް އަދިނެތީމެވެ. 2023 ގެ އިންތިހާބަށް ފަހު އަޅުގަނޑު މިހުރީ ސިޔާސީ ކަންކަމާ ވަރަށް ދުރުގައެވެ. އަޅުގަނޑާމެދު ކަންކޮށްފައިވާގޮތުން ފޫހިވެފަ ހުރިލެއް ބޮޑުކަމުންނެވެ." މަހްލޫފް އެކްސްގައި ކުރި ޕޯސްޓުގައިވެއެވެ.
މަހްލޫފް ވިދާޅުވީ އެމްޑީޕީ ސަރުކާރުގައި މަގާމެއް ހައްގުވާނަމަ އެންމެ ފުރަތަމަ ގުނާ އެކަކަށް އޭނާ ވާނެއެވެ. އަދި އޭނާއަށް ސަރުކާރުން ދިން ވަޒީރުކަމަކީ ތަބަކަށް ލާފަދިން މަގާމެއް ނޫންކަމަށްވެސް މަހްލޫފް ވިދާޅުވިއެވެ.
މަހްލޫފްވަނީ ޕީއެންސީއާ ގުޅުމަށް އޭނާއަށް އެތައް ފަހަރަކު އެ ޕާޓިް ދައުވަތު ދިންކަން ހާމަކޮށްފައެވެ. އަދި އެޕާޓީއަށް ގެންދިޔުމުން އެކަމުގެ ޝުކުރު އޭނާވަނީ ރައީސް މުއިއްޒަށްް އަދާކުރައްވާފައެވެ.
" ރާއްޖޭގެ ތަރީހުގައި ބޭއްވި އެންމެ ބޮޑު ސިޔާސީ އެއްވުމުގައި ސޮއިކޮށްލަން ލިބުމުން އިތުރު އުފަލެއް ލިބުނެވެ. އަޅުގަނޑުގެ މިނިންމުމާއެކު ހިތްހަމަ ނުޖެހުނު ފަރާތްތަކުން މައާފަށް އެމެވެ. އަދި މަރުހަބާ ވިދާޅުވި އެންމެހާ ބޭފުޅުންނަށް ޝުކުރު ދަންނަވަން." މަހްލޫފް ވިދާޅުވިއެވެ.
