އިންސްޓްޓިއުޓް އޮފް ޗާޓާޑް އެކައުންޓެންޓްސް އޮފް މޯލްޑިވްސް، (ސީއޭ މޯލްޑިވްސް) އާއި މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) ގުޅިގެން އިއްޔެ ކުރިއަށް ގެންދިޔަ ޓެކްސް ފޯރަމް ފެށުމުގެ ރަސްމިއްޔާތުގައި ޒަރީރު ވިދާޅުވީ، މުޅި ދުނިޔޭގައި ޓެކުހާ ގުޅޭ ގޮތުން ކުރާ މަސަައްކަތުގެ އަމާޒަކީ އެ ދާއިރާ އިން ބައިނަލްއަގުވާމީ އެއްބާރުލުން އިތުރު ކުރުން ކަމަށެވެ.
ސީއޭ މޯލްޑިވްސް އާއި މީރާ ގުޅިގެން ފެށި ޓެކްސް ފޯރަމަކީ ރާއްޖޭގައި ބާއްވާ މިފަދަ ފުރަތަމަ ފޯރަމެވެ. މީރުމާ ހޯލްގައި ކުރިއަށް ދިޔަ މި ފޯރަމްގައި 150 ފަރާތަކުން ބައިވެރިވި އެވެ.
ރާއްޖެ ޑިޖިޓަލައިޒް ކުރުމުގެ މަސައްކަތް ހަލުވިކަމާ އެކު، ކުރިއަށް ގެންދާ ދުވަސްވަރެއްގައި ބާއްވާ އެ ފޯރަމްގެ ޝިއާރަކީ "ޝޭޕިން އަ ސްމާޓާ ޓެކްސް ފިއުޗާ ޓުގެދާ" އެވެ.
ޒަރީރު ވަނީ، ޓެކްސް ނިޒާމުގެ އިތުބާރު ދެމެހެއްޓުމަކީ ޓެކްސް ނެގުމާ ގުޅޭ ދާއިރާގެ ހުރިހާ ޕްރޮފެޝަނަލުން ވެސް ހިއްސާވެ، ޒިންމާވާން ޖެހޭ ކަމެއް ކަމަށާއި އެހެންވެ އެ ދާއިރާގެ އިތުބާރު ދަމަހައްޓަން ޓެކްސް ކޮމިޝަނަރު ހަސަން ޒަރީރު އެދިވަޑައިގެންފަ އެވެ.
ޓެކްސް އަށް މަކަރު ހަދައި، ޓެކްސްގެ ގޮތުގައި ދައްކާ ފައިސާ މަދުކުރަން އެހީތެރިވާ ސްކީމުތަކަށް އެހީތެރިވުމަކީ ހަމަ އެކަނި އިތުބާރު ގެއްލޭނެ ކަމެއް ނޫން ކަމަށާއި އެއީ ރާއްޖޭގެ ތަރައްގީ އަށް ހުރަސް އެޅޭނެ ކަމެއް ކަމަށް އޭނާ ވިދާޅުވި އެވެ.
ޓެކްސް އެކައުންޓިން އަދި އޮޑިޓް ދާއިރާ އަށް އަމާޒުކޮށްގެން ބޭއްވި އެ ފޯރަމްގައި ޓެކުހާ ގުޅޭ ސިޔާސަތުތައް އެކުލަވައިލާ ދިވެހި ބޭފުޅުންނާއި ބައިނަލްއަގުވާމީ ފަންނީ ބޭފުޅުން މައުލޫމާތު ދެއްވި އެވެ.
