ސަރުކާރުން ޓެކްސީ ހިދުމަތް ފަށަން ސަރުކާރުން މިހާތަނަށް ވަނީ ތާފު ތާރީހުތައް ދީފައެވެ.
ސަރުކާރަށް ދެ އަހަރު ފުރުން ފާހަގަކުރުމަށް ރޭ ސޯޝަލް ސެންޓަރުގައި ބޭއްވި ޖަލްސާގައި ސަރުކާރު މިހާތަނަށް ކޮށްފައިވާ މަސައްކަތްތައް ހާމަކުރައްވަމުން ރައީސް މުއިއްޒު ވަނީ ޓެކްސީ ލައިން ފަށަން އަނެއްކާވެސް ތާރީހެއް ދެއްވާފައެވެ.
ރައީސް މުއިއްޒު ވިދާޅުވީ އެމަނިކުފާނު ވައުދުވީ ގޮތަށް ޒަމާނީ ވަރަށް ފެންވަރު ރަނގަޅު ޓެކްސީތަކާއި އެކު މާލޭ ސަރަހައްދުގައި ޓެކްސީ ލައިންގެ ހިދުމަތް އަންނަ ފެބްރުއަރީ މަހު ފަށާނެކަމަށެވެ. އަދި މި ހިދުމަތް ފެށުމުން ޓެކްސީ ޑްރައިވަރުން ބާކީ ނުވާނެކަމަށްވެސް ރައީސް މުއިއްޒު ވިދާޅުވިއެވެ.
ޓެކްސީ ލައިންގެ ހިދުމަތް ދިނުމަށް ހަވާލުކޮށްފައިވަނީ އެމްޓީސީސީއާ އެވެ. އެ މަޝްރޫއުގެ ފުރަތަމަ ފިޔަވަހީގައި 80 މިލިއަން ރުފިޔާ ހަރަދުކޮށްގެން 100 ކާރު ގެންނާނެ ކަމަށް އެ ކުންފުނިން ވަނީ ބުނެފައެވެ.
