ދައުލަތުން އަންނަ އަހަރަށް ހުށައަޅާފައިވަނީ 64.2 ބިލިއަންގެ ރެކޯޑް ބަޖެޓެކެވެ. ބަޖެޓް ބަހުސްގައި ވާހަކަ ދައްކަވަމުން ސިޔާމް ވިދާޅުވީ އަންނަ އަހަރަށް ލަފާކޮށް ހުށަހަޅާފައިވަނީ ރެކޯޑު އަދަދެއްގެ ބޮޑު ބަޖެޓެއް ކަމަށާއި ބަޖެޓެއްގެ އެންމެ މުހިއްމު ކަމަކީ ލިބޭ ފައިސާ އެންމެ ރަނގަޅު ގޮތުގައި ހަރަދުކުރުން ކަމަށެވެ.
އަންނަ އަހަރު ރާއްޖެއިން ދަރަންޏަށް އެއް ބިލިއަން ޑޮލަރު ދައްކަންޖެހޭއިރު، އެ ފައިސާއަކީ އަދި ދައުލަތުގައި ހުރި ފައިސާއެއް ނޫން ކަމަށް ސިޔާމް ވިދާޅުވިއެވެ. އަދި އެ ފައިސާ ވެސް ހޯދަން ޖެހެނީ ދައުލަތުން ބޮންޑު ވިއްކައިގެން ކަމަށް ވާއިރު ދައުލަތުގެ ހަރަދުތައް ކުޑަކުރަން ޖެހޭކަމަށެވެ.
ސިޔާމް ވިދާޅުވީ މީގެ ދެ އަހަރު ކުރިއާ އަޅާބަލާއިރު މިހާރު ވިޔަފާރިތަކަށް ކޮމާޝަލް ބޭންކުތަކުން ދޫކުރާ ލޯނުތަކުގެ އިންޓްރެސްޓު ބޮޑުވެފައިވާ ކަމަށެވެ.
ކުރިއަށް އޮތް ތަނުގައި ދައުލަތުގެ މުވައްޒަފުންގެ މުސާރަ ބޮޑުވާ ނަމަ އިންފްލޭޝަނަށް އޭގެ އަސަރު ކުރާނެކަން ސިޔާމް ފާހަގަކުރެއްވިި އެވެ.
