އާޒިމް މިހެން ވިދާޅުވީ ކައުންސިލްގެ އޮޑިޓްގެ ކަންކަން ލަސްވާތީއާއި، ފޮނުވާ ސިޓީތަކަށް ޖަވާބު ނުލިބޭ މައްސަލައިގައި ހައްލެއް ހޯއްދެވުމަށް މިއަދު އޮޑިޓް އޮފީހަށް ވަޑައިގެން ދެއްކެވި ވާހަކަފުޅުގައެވެ.
ކައުންސިލުން ފުރިހަމަ އެއްބާރުލުން ދެމުންދާއިރު ވެސް، މިހާތަނަށް އެކަމަށް އަލިމަގެއް ފެނިފައިނުވާތީ މޭޔަރު ވަނީ ކަންބޮޑުވުން ފާޅުކުރައްވާފައެވެ.
އޮޑިޓާ ޖެނެރަލްގެ އޮފީހަށް ދައުލަތުގެ ބަޖެޓުން ބޮޑު ހޭދައެއް ކުރާއިރު، އެއަށްވުރެ ޒިންމާދާރުވާން ޖެހޭނެ ކަމަށް އާޒިމް ވިދާޅުވިއެވެ. ރާއްޖޭގެ ދެވަނައަށް އެންމެ ބޮޑު އިދާރާ ކަމަށްވާ މާލެ ސިޓީ ކައުންސިލްގެ އޮޑިޓް ނުކޮށް އޮތުމަކީ ވަރަށް ބޮޑު އިހުމާލެއްގެ ގޮތުގައި ސިފަކުރައްވައި، އާޒިމް ވަނީ ކައުންސިލްގެ ހިންގުން މިހާރަށްވުރެ ހަރުދަނާ ކުރުމަށްޓަކައި ވީހާވެސް އަވަހަކަށް އޮޑިޓްގެ މަސައްކަތް ނިންމައިދިނުމަށް އޮޑިޓާ ޖެނެރަލްއަށް ގޮވާލައްވާފައެވެ.
