މި މައްސަލައާ ގުޅިގެން ހައްޔަރުކޮށްފައިވަނީ، އުމުރުން 26 އަހަރުގެ މުހައްމަދު ޝައިހާން، ހ. ގާޑަންބިއުޓީ އެވެ. އޭނާގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް އިއްޔެ ހާޒިރުކުރުމުން، ކޯޓުން ވަނީ އޭނާ 15 ދުވަހުގެ މުއްދަތަށް ބަންދުކުރުމަށް އަމުރުކޮށްފަ އެވެ.
ޝައިހާންގެ މައްޗަށް ތުހުމަތުކޮށްފައި ވަނީ ފޭރުމާއި، ބިރުދެއްކުމުގެ އިތުރުން ތޫނު ހަތިޔާރު ގެންގުޅުމުގެ ކުށެވެ. މި މައްސަލައިގެ އަޑުއެހުމުގައި ފުލުހުން ކޯޓުގައި ބުނި ގޮތުގައި އޭނާ ހައްޔަރުކުރީ މީހެއްގެ އަތުން ފޯނު ފޭރުމަށްފަހު ފިލަން އުޅެނިކޮށެވެ. އަދި މި ފޭރުމުގެ އަމަލު ހިންގުމުގައި އޭނާއާއެކު އިތުރު މީހަކު ބައިވެރިވެފައިވާކަން ފާހަގަކުރެވޭ ކަމަށްވެސް ފުލުހުން ވަނީ ކޯޓުގައި މައުލޫމާތު ދީފަ އެވެ.
މި ހާދިސާގައި ފޭރުނު ފޯނު އަނބުރާ ހޯދިފައިވާކަން ނުވަތަ މައްސަލައިގައި ދެން ހިމެނޭ މީހާ ފުލުހުންގެ ބެލުމުގެ ދަށަށް ގެންގޮސްފައިވާކަން އަދި ސާފެއް ނުވެ އެވެ. މާލޭގައި މިފަދަ މައްސަލަތައް އިތުރުވަމުން އަންނައިރު، މި ވަކި މައްސަލައާ ގުޅޭ އިތުރު ތަފުސީލެއް ފުލުހުން ރަސްމީކޮށް ހާމަކޮށްފައެއް ނުވެ އެވެ.
