އެކަމަނާ މިކަމަށް ގޮވާލެއްވީ ނުކުޅެދުންތެރިކަން ހުންނަ މީހުންނަށް ވަޒީފާގެ ފުރުސަތު ފަހިކޮށްދިނުމުގެ ގޮތުން މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ފެށި "ފަހި ޕްރޮގްރާމް- އެކުއެކީ، ގުޅިގެން" އިފުތިތާހު ކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.
ހާއްސަ އެހީއަށް ބޭނުންވާ މީހުންނާމެދު މުޖުތަމައު ދެކޭގޮތް ބަދަލުކުރަންޖެހޭކަން ފާހަގަކުރައްވައި ރައީސުލްޖުމްހޫރިއްޔާގެ އަނބިކަނބަލުން ވިދާޅުވީ، އެހެން މީހުންގެ ވޭނާއި ދަތިތައް އިހުސާސްކޮށް، އެކަންކަމަށް އިހުތިރާމް ކުރާ ބަޔަކަށް ވުމަކީ ތަހުޒީބީ މުޖުތަމައެއްގެ ސިފަ ކަމަށެވެ.
އެމްޕީއެލްއިން ފެށި މި ޕްރޮގްރާމަކީ ރައީސް ޑރ. މުހައްމަދު މުއިއްޒުގެ ތަސައްވުރާ އެއްގޮތަށް ކުރިއަށްގެންދާ މުހިންމު މަސައްކަތެއްކަން ފާހަގަކުރައްވައި މެޑަމް ސާޖިދާ ވިދާޅުވީ، މީގެ ސަބަބުން ގިނަ ރައްޔިތުންތަކަކަށް އަމިއްލަ މަސައްކަތުން އާމްދަނީ ހޯދައި، އަބުރުވެރި ދިރިއުޅުމެއް އުޅުމުގެ މަގު ފަހިވެގެންދާނެ ކަމަށެވެ. އަދި މި ފުރުސަތުގެ ބޭނުންހިފައި، މުޖުތަމައުއަށް ފައިދާހުރި ބަޔަކަށް ވުމަށް އެކަމަނާ ވަނީ ހާއްސަ އެހީއަށް ބޭނުންވާ ފަރާތްތަކަށް ހިތްވަރު ދެއްވާފައެވެ.
