ސުޕްރީމް ކޯޓުން މައުލޫމާތު ދިން ގޮތުގައި ރާއްޖޭގެ ފަރާތުން މި އެއްބަސްވުމުގައި ސޮއި ކުރެއްވީ އުއްތަމަ ފަނޑިޔާރު އަބްދުލްގަނީ މުހައްމަދެވެ. އަދި ސައުދީގެ ފަރާތުން ސޮއިކުރެއްވީ ޖަސްޓިސް މިނިސްޓަރު ޑރ. ވާލިދް އަލް ސަމާނީ އެވެ.
ސުޕްރީމް ކޯޓުން ބުނީ ފަސް އަހަރު ދުވަހުގެ މުއްދަތަށް ސޮއިކުރި އެ އެއްބަސްވުމުގެ ދަށުން ޝަރުއީ ދާއިރާއާ ގުޅުންހުރި ގާނޫނީ އަދި އިދާރީ އުސޫލުތައް ހަރުދަނާކޮށް، ފަނޑިޔާރުންނާއި ޝަރުއީ ދާއިރާގައި މަސައްކަތްކުރާ މީހުންގެ ޕްރޮފެޝަނަލް ކަމާއި ގާބިލްކަން ތަރައްގީކޮށް، ކުރިއެރުވޭނެ ކަމަށެވެ.
މީގެ އިތުރުން ޝަރުއީ މަސައްކަތްތައް ކުރުމުގެ އުސޫލުތަކާއި ނިޒާމުތައް ހަރުދަނާ ކުރުމާއި އެ ދާއިރާއާ ގުޅުންހުރި މައުލޫމާތާއި ތަޖްރިބާ އަދި ބައިނަލްއަގްވާމީ ބެސްޓް ޕްރެކްޓިސްތަކާ ގުޅޭ މައުލޫމާތުތައް ވެސް އެ އެއްބަސްވުމުގެ ދަށުން ދެ ގައުމުން ހިއްސާ ކުރާނެ ކަމަށެވެ.
ސުޕްރީމް ކޯޓުން ބުނި ގޮތުގައި އެ އެއްބަސްވުމުގެ ދަށުން ފަންނީ ކޮންފަރެންސްތަކާއި ތަމްރީން ޕްރޮގްރާމްތަކުގެ އިތުރުން ފަންނީ މާހިރުންގެ ތަޖްރިބާތަކާއި ހުނަރުތައް ވެސް ހިއްސާކޮށް، މަޝްވަރާ ބައްދަލުވުންތައް ބާއްވާނެ އެވެ.
މިއީ ރާއްޖޭގެ ޖުޑިޝަރީން އަރަބި އިސްލާމީ ގައުމެއްގެ ޖުޑިޝަރީއާ ދެމެދު ސޮއި ކުރެވުނު ފުރަތަމަ އެއްބަސްވުމެވެ.
