ފޭސްބުކްގައި ފަޒުނާ ކުރެއްވި ޕޯސްޓެއްގައި ވިދާޅުވީ އެ ދެ ބޭފުޅުންގެ ދެމެދުގައި އޮތް ހިޔާލުތަފާތުވުމަކީ އާއިލީ އަރައިރުމެއްގެ ގޮތުގައި ސިފަކުރުމުން އެމްޑީޕީގައި ހުރި މައްސަލަތައް ހައްލު ކުރުމަށް ވެސް ހުރަސްއެޅޭ ކަމަށެވެ.
ފަޒްނާގެ ޕޯސްޓުގައި އިތުރަށް ވިދާޅުވެފައިވާ ގޮތުގައި ސްކޫލު ދައުރުގައި އުފެދޭ އެކުވެރިކަން ގިނަ ފަހަރަށް ބިނާވަނީ ޝައުގުވެރިކަން ހުންނަ އެއްކަހަލަ ކަންތައްތަކެއްގެ ސަބަބުން ކަމަށާއި ނަޝީދާއި އިބޫއަކީ ވެސް މަދަރުސީ ދަައުރުން ފެށިގެން ވެސް ދާދި އެއް ކަންތައްތަކަކަށް ޝައުގުވެރިކަން ހުންނެވި ދެ ބޭފުޅުން ކަމަށެވެ.
ފަޒްނާ ވިދާޅުވީ ދެ ބޭފުޅުންނަކީ ވެސް ފޮތް ވިދާޅުވާން ޝައުގުވެރިވާ ދެ ބޭފުޅުން ކަމަށާއި ނޫސްވެރިކަމާއި ލިޔުންތެރިކަމަކީ ކުޅިވަރު ކުޅުމާއި ކުޅިވަރު ކުޅޭތަން ބަލަންދިއުމާއި މިއުޒިކް އަޑުއެހުމާއި ރާޒުވާ ކުޅުމާއި ކަޅޫ ސައި ބުއިމަކީ ވެސް ދެ ބޭފުޅުން އެކުގައި ކުރެއްވި ކަންކަން ކަމަށެވެ.
ރާއްޖޭގެ އެންމެ ގިނަ ދުވަސްވީ ޕާޓީގެ ތެރޭގައި އޮތް ސިޔާސީ ހިޔާލުތަފާތުވުމުގެ ބަހުސް އަލުން ފެށިފައި މި ވަނީ އެ ޕާޓީގެ ޗެއާޕާސަންކަމުން ފައްޔާޒު އިސްމާއީލް އިސްތިއުފާ ދެއްވުމުންނެވެ. އޭނާގެ އިސްތިއުފާ ސިޓީގައި ވަނީ ދެ ރައީސުންގެ މެދުގައި އޮތް ނުތަނަވަސްކަން ހައްލުކުރުމަށް ޗެއާޕާސަންގެ ހައިސިއްޔަތުން ކުރެއްވި ބައެއް ކަންކަން ހާމަކުރައްވައިފަ އެވެ.
ފަޒްނާ ވިދާޅުވި ގޮތުގައި މުހިއްމީ ކަންކަން ހައްލުކުރުމުގެ ރޫހުގައި އިށީނދެ ޕާޓީ އާއި ޕާޓީގެ ލީޑަރުންނާއި ލީޑަޝިޕްގައި ހުރި އުނި ސިފަތަކުގެ ވާހަކަ ކެރިގެން އަޑުއަހައި އެ ކަންކަން ހައްލުކުރުމެވެ.
ކުރިން ވަރަށް އަރިސް ދެ ބޭފުޅުން ކަމަށްވާ ސޯލިހުއާއި ނަޝީދުގެ ގުޅުން ގޯސްވީ, ސޯލިހުގެ ވެރިކަން މެދަކާ ހިސާބަށް ވެސް ނުދަނީހެވެ. ނަޝީދަށް ވާދަ ނުކުރެއްވުމުން ބަދަލުގައި ނުކުންނަވައި ރިޔާސީ އިންތިހާބު ކާމިޔާބު ކުރެއްވި ސޯލިހުގެ ވެރިކަމުގައި މަޖިލިސް ރައީސްއަކަށް ހުންނަވައި ނަޝީދު ބޭނުންފުޅުވީ ނިޒާމު ބަދަލުކޮށް, ބޮޑުވަޒީރަކަށް ވެވަޑައިގަންނަވާށެވެ.
ސޯލިހަށް ދެވަނަ ދައުރެއް ނުލިބުމުގެ އެންމެ ބޮޑު ބާރަކަށްވި އެއް ސަބަބަކީ ނަޝީދުގެ ތާއީދު އެ މަނިކުފާނަށް ނުލިބި، އެމްޑީޕީ ދެފަޅިވުމެވެ. ނަމަވެސް ނަޝީދު މިހާރު އަނެއްކާވެސް އަލުން އަނބުރާ އެމްޑީޕީއާ ގުޅިގެންނެވި އެވެ.
