އަތޮޅު ކައުންސިލުތައް އުވާލުމަށްޓަކައި ގާނޫނުއަސާސީއަށް ގެންނަންޖެހޭ ބަދަލުތައް ގެންނަން ސަރުކާރުގެ ފަރާތުން ރައްޔިތުންގެ މަޖިލީހަށް ހުށައެޅި ބިލު ޕީއެންސީގެ މެޖޯރިޓީން އިއްޔެ ވަނީ ފާސްކޮށްފައެވެ.
މި ނިންމުމާއި ގުޅިގެން ގާސިމް އިބްރާހިމް އެކްސްގައި ކުރެއްވި ޕޯސްޓެއްގައި ބުނީ އަތޮޅު ކައުންސިލްތައް އުވާލުމަށް ޕީއެންސީގެ ޕާލިމެންޓްރީ ގުރޫޕުން ގާނޫން އަސާސީއަށް ގެނައި އިސްލާހަކީ ވަރަށް މުހިންމު އަދި އެހާމެ މުނާސަބު އިސްލާހެއް ކަމަށެވެ. އަދި 2011 ވަނަ އަހަރު ހިންގަން ފެށި ލާމަރުކަޒީ ނިޒާމުގެ ތަޖުރިބާއިން ބަލާނަމަ އަތޮޅު ކައުންސިލަކީ، ކޮންމެހެން ރާއްޖޭގެ ހާލަތުގައި އޮންނަށް ޖެހޭ ލޭޔަރެއް އެއް ނޫންކަން ހާމަވެފައިވާކަމަށް ގާސިމް ވިދާޅުވިއެވެ.
މީގެއިތުރުން އަތޮޅު ކައުންސިލް އުވާލުމަކީ ރަށު ކައުންސިލްތަކުން ދޭ ހިދުމަތްތައް އަވަސްވެގެން ދާނެކަމެއްކަމަށާއި އަދި މިނިސްޓްރީ އޮފް ސިޓީސް، ލޯކަލް ގަވާމަންޓް އެންޑް ޕަބްލިކް ވާކްސް އުފެދިފައިވާތީ އަތޮޅު ކައުންސިލް އޮތުމަކީ މުހިއްމު ކަމެއް ނޫންކަމަށްވެސް ގާސިމް ވިދާޅުވިއެވެ.
ޤައުމުގެ ހިންގުން ހަރުދަނާކޮށް، އެފިޝެންސީ އިތުރުކޮށް، ހަރަދުކުޑަކޮށް ގައުމު ކުރިއަށް ގެންދިއުމަށް އަޅާ މިފަދަ ކޮންމެ ފިޔަވަޅަކަށް ޖުމްހޫރީ ޕާޓީގެ ފުރިހަމަ އެއްބާރުލުމާއި ތާއީދު ލިބޭނޭކަމަށްވެސް ގާސިމް ވިދާޅުވިއެވެ.
