މި ސަރުކާރުން ހުށަހަޅައި، މިދިޔަ އަހަރު ފާސްކުރި ގާނޫނަށް ބަދަލު ގެންނަން ސަރުކާރުގެ ފަރާތުން މަޖލިހަށް ހުށައެޅުއްވީ ހުރާ ދާއިރާގެ ޕީއެންސީގެ މެމްބަރު ޑރ އަނާރާ ނައީމްއެވެ.
ދައުލަތުގެ ހަރަދަށް ޒިންމާވާ ގާނޫނުގެ ބަދަލުގައި، ސަރުކާރުން ހުށަހަޅައި، ދައުލަތުގެ ފިސްކަލް ޒިންމާގެ ގާނޫނެއް މިދިޔަ އަހަރުގެ ނޮވެމްބަރު މަހު ވުޖޫދުކުރި ގާނޫނުގައި ބުނެފައިވަނީ ކޮންމެ ރިޔާސީ ދައުރެއް ފެށޭތާ ހަ މަސް ތެރޭގައި ފަސް އަހަރުގެ ފިސްކަލް ޒިންމާގެ ޗާޓަރެއް ފިނޭންސް މިނިސްޓަރު އެކުލަވާލައި، ގެޒެޓުގައި އާންމުކުރަން ޖެހޭނެކަމަށެވެ.
އެހެނަމަވެސް، ސަރުކާރުގެ މެމްބަރު ޑރ. އަނާރާ ނައީމް އެ ގާނޫނަށް ހުށަހެޅުއްވި އިސްލާހުގައި ވަނީ ގާނޫނުގެ ދަށުން އެކުލަވާލަންޖެހޭ ފުރަތަމަ ޗާޓަރު ހަދަންޖެހޭ މުއްދަތު، ކުރިން އޮތް ހަ މަސް ދުވަހުގެ ބަދަލުގައި، 24 މަސް ދުވަހަށް އިތުރުކުރުމަށް ހިމަނާފައެވެ.
މީގެ އިތުރުން، މި ގާނޫނުގައި ރިޔާސީ ދައުރެއް ހިނގަން ފަށާ މުއްދަތަކީ 18 މަސް ދުވަސްކަމަށް ކަނޑައަޅާފައިވާ މާއްދާ އުނިކުރަންވެސް ވަނީ ހުށައަޅާފައެވެ.
ދައުލަތުގެ ފިސްކަލް ޒިންމާގެ ގާނޫނެއް މި ސަރުކާރުން ހެދީ ސަރުކާރުން އިތުރަށް ފައިސާ ޗާޕު ކުރަން ޖެހިއްޖެނަމަ އަމަލުކުރާނެ އުސޫލުތައް ހަރުދަނާކުރުމަށް ސަރުކާރުން ވަނީ ބުނެފައެވެ.
