މި ހާދިސާގައި މިހާތަނަށް މަދުވެގެން 44 މީހުން މަރުވެފައިވާއިރު، މިއީ އެ ސިޓީގެ ފަހުގެ ތާރީހުގައި ހިނގި އެންމެ މީހުން މަރުވި އެއް ހާދިސާ ކަމަށް ރިޕޯޓުތައް ބުނެ އެވެ.
މި އަލިފާނުގެ ހާދިސާ ހިނގަން ފަށާފައިވަނީ ބުދަ ދުވަހުގެ މެންދުރުފަހު، ހޮންކޮންގުގެ އުތުރުގެ ސަބާބެއް ކަމަށްވާ ޓައި ޕޯ ޑިސްޓްރިކްޓްގައި ހުންނަ ވޮންގް ފުކް ކޯޓް ކޮމްޕްލެކްސްގަ އެވެ. އެ ކޮމްޕްލެކްސްގައި ހިމެނޭ އަށް ޓަވަރުގެ ތެރެއިން ހަތް ޓަވަރަށް އަލިފާންގަނޑު ވަނީ ވަރަށް އަވަހަށް ފެތުރިފަ އެވެ. މިއަދު ހެނދުނުވެސް އެ އިމާރާތްތަކުން ބޯކޮށް ދުމުގެ އަސަރު ފެންނަމުންދިޔަ އެވެ.
ހޮންކޮންގުގެ ފަޔަ ސާވިސް އިން ދެ ވަނަ ދުވަހު ވެސް ދަނީ އަލިފާން ނިއްވުމުގެ މަސައްކަތް ހުއްޓުމެއްނެތި ކުރަމުންނެވެ. އެ އިދާރާއިން ބުނި ގޮތުގައި، ބުރާސްފަތި ދުވަހުގެ ހެނދުނުގެ ވަގުތ އަލިފާން ފެތުރުނު ހަތް ޓަވަރުގެ ތެރެއިން ހަތަރު ޓަވަރުގެ އަލިފާންގަނޑު ކޮންޓްރޯލް ކުރެވިފަ އެވެ. އަލިފާން ނިއްވުމުގެ މަސައްކަތް ކުރަމުންދާއިރު، މީހުން ސަލާމަތްކުރުމުގެ މަސައްކަތްވެސް އަދިވެސް ކުރިއަށް އެބަދެ އެވެ.
