މީހުންނަށް ގެއްލުންވާ ގޮތަށް ހުންނަ ގަސް ކަނޑުމަކީ ދީނީ ގޮތުން ހުއްދަކަމެއްކަމަށާއި އެކަން އެގޮތަށް ކުރުމުން ސަވާބު ލިބޭނެކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
Advertisement
މިނިސްޓަރު މިހެން ވިދާޅުވެފައި މިވަނީ ވިލިމާލޭގައި ހުރި ޒަމާންވީ ނިކަ ދެ ގަސް ކަނޑާލުމަށް ސަރުކާރުން ނިންމުމުން އެކަމާއި ދެކޮޅަށް ތިމާވެއްޓަށް ލޯބި ކުރާ ފަރާތްތަކުން ކަންބޮޑުވުން ފާޅުކުރަން ފެށުމުންނެވެ.
މިނިސްޓަރު ޝަހީމް 'ފޭސްބުކް'ގައި ކުރެއްވި ޕޯސްޓެއްގައި ވިދާޅުވީ މީހުންނަށް ހިޔާ ނުވަތަ މޭވާއާއި އެހެނިހެން ފައިދާތައް ލިބޭ ގަސްގަހާގެހި ރައްކާތެރިކޮށް ހިމާޔަތްކުރުމަށް އިސްލާމްދީން ބާރު އަޅާ ކަމަށެވެ.
"އާންމު އުނދަގުލަކަށްނުވާ ގޮތައް ހުންނަ ގަސްގަހާގެހި ބަލަހައްޓައި އެއަށް ރައްކާތެރިކަން ދިނުމަކީ އިސްލާމްދީނުގައި ނުހަނު ބާރު އަޅުއްވާފައިވާ ކަމެއް. ގަސް އިންދުމާއި ގަސްތައް އިތުރުކުރުމާއި ވަކިން ހާއްސަކޮށް މޭވާއާއި ހިޔާ ލިބޭ ގަސްގަހާގެހި ގިނަކުރުމަކީ އިސްލާމީ ނަޒަރުން ބަލާއިރު ވަރަށް މުހިންމުކަމެކެވެ." ޝަހީމްގެ ޕޯސްޓުގައިވެއެވެ
އެހެން އެކަން އޮތް ނަމަވެސް އާންމު އުނދަގުލަކަށްވާ ގޮތަށް، ނުވަތަ މީހުންގެ ގެދޮރަށް ގެއްލުންވާ ގޮތަށް ހުންނަ ގަސްގަހާގެއްސާއި އެ ގަސްގަހުގެ ގޮފިތަކާއި މޫތައް، ގެއްލުމުގެ މިނަށް ބަލައި ކެނޑުން ލާޒިމުކަމަށް ޝަހީމް ވިދާޅުވިއެވެ. އަދި އެކަމުން ސަވާބު ލިބޭނެކަމަށްވެސް މިނިސްޓަރު ވިދާޅުވިއެވެ.
" ކީރިތި ރަސޫލާގެ ސުންނަތުން ވާރިދުވެފައިވާ ހާދިސާއެއްގައިވާ ގޮތުން މީސްތަކުންނަށް ގެއްލުންވާގޮތަށް މަގުމަތީގައި ހުރި ގަހެއްގެ ގޮފި ކަނޑާލުމުން، (އެހެން ރިވާޔަތެއްގައިވާ ގޮތުން) ގެއްލުންވާގޮތަށް ހުރި ގަހެއް ކަނޑާލުމުން، މާތް ﷲ އެކަން ކުރިމީހާއަށް ރަހްމަތްލައްވައި އޭނާގެ ފާފަތައް ފުއްސަވައި ދެއްވިއެވެ." ޝަހީމް ލިޔުއްވާފައިވެއެވެ.
ރައީސް ވަނީ ވިލިމާލޭގައި ދެ ނިކަގަސް ނަގައި، އޭގެ ބަދަލުގައި 300 ގަސް އިންދަން ނިންމާފައިވާކަމަށް ވިދާޅުވެފައެވެ.
