ޔުނިސެފްގެ ގުޑްވިލް އެމްބެސަޑަރެއްގެ ހައިސިއްޔަތުން އިންޑިއާގެ މުމްބާއީއަށް ގޮސް ހުރި ބެކަމް، އޭނާގެ ހިތުގެ އެ ޝުއޫރުތައް ހިއްސާކުރީ 'އެލް އިންޑިއާ' އާ ވާހަކަ ދައްކަމުންނެވެ.
ބެކަމް ބުނީ މީގެ ދެ އަހަރު ކުރިން އިންޑިއާއަށް ފުރަތަމަ ފަހަރަށް ކުރި ދަތުރުން ވަރަށް ބޮޑަށް ހައިރާންވި ކަމަށާއި، އޭރު ހީކުރިވަރަށް ވުރެ އެތައް ގުނައެއް ބޮޑަށް އެ ގައުމުދެކެ ލޯބިވާ ކަމަށެވެ.
މި ދަތުރުގެ ތެރެއިން ބެކަމް ވަނީ އިންޑިއާގެ މަޝްހޫރު ފަންނާނުންނާ ބައްދަލުކޮށްފަ އެވެ. އޭގެ ތެރޭގައި ތެލުގޫ އެކްޓްރެސް ސަމަންތާ ރުތު ޕްރަބޫ، އެކްޓަރު ދަނުޝް އަދި ސޯޝަލް މީޑިއާގައި މަގުބޫލު ޕްރަޖަކްތާ ކޯލީ ހިމެނެ އެވެ. ހާއްސަކޮށް، ސަމަންތާ އާއި ބެކަމް ބައްދަލުކުރުމަށްފަހު އެކަކު އަނެކަކަށް ވަކިވުމުގެ ގޮތުން ސަލާންކޮށް ބައްދާލި މަންޒަރު ފެންނަ ވީޑިއޯއެއް ވަނީ ސޯޝަލް މީޑިއާގައި ވަރަށް ބޮޑަށް ވައިރަލްވެފަ އެވެ.
