މިއަދު ނޫސްވެރިންނާއި ބައްދަލުކޮށް ވާހަކަ ދައްކަވަމުން ޕީއެންސީގެ ކެމްޕެއިން މެނޭޖަރު އަދި އެޕާޓީގެ ޕާލިމެންޓަރީ ގްރޫޕްގެ ލީޑަރު، އިނގުރައިދޫ ދާއިރާގެ މެމްބަރު އިބްރާހިމް ފަލާހް ވިދާޅުވީ އިންތިހާބުގައި ވާދަކުރަން މާދަމާއިން ފެށިގެން ނަން ހުށައެޅޭނެކަމަށެވެ. އެއް ދާއިރާއަކަށް އެ މެމްބަރަށްވުރެ ގިނަ މެމްބަރުން ވާދަކުރާނަމަ ޕްރައިމެރީ އޮންނާނެކަމަށާއި ޕްރައިމެރީގެ ވޯޓްލުން އޮންނާނީ އަންނަމަހުގެ 27ގައިކަމަށް ފަލާހް ވިދާޅުވިއެވެ. އަދި ޕީއެންސީގެ ޕްރައިމެރީ ވާނީ މިހާތަނަށް ޕާޓީއަކުން ބާއްވާ އެންމެ ބޮޑު ޕްރައިމެރީއަށްކަމަށްވެސް ފަލާހް ވިދާޅުވިއެވެ.
އިންތިހާބުގައި ވާދަކުރަން އެދޭ ޕީއެންސީ މެމްބަރުންނަށް ނަން ހުށައެޅުމަށް ޕޯޓަލެއް ހަދާފައިވާނެކަމަށްވެސް ޕީއެންސީގެ އިންތިހާބުތަކާއި ބެހޭ ކޮމެޓީގައި ހިމެނިވަޑައިގަންނަވާ ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވިއެވެ.
ލޯކަލް ކައުންސިލް އިންތިހާބުގެ ވޯޓްލުން އޮންނާނީ އަންނަ އަހަރުގެ މާރިޗުމަހުގެ 28 ވަނަ ދުވަހުކަމަށް އިލެކްޝަންސް ކޮމިޝަނުން ވަނީ ބުނެފައެވެ. އަދި އިންތިހާބަށާް ކުރިމަތިލުމަށް އަންނަ ޖެނުއަރީ މަހުގެ 17 ވަނަ ދުވަހު ހުޅުވާލާނެކަމަށްވެސް އެ ކޮމިޝަނުން ވަނީ ބުނެފައެވެ.