އެމްޑީޕީގެ ވަގުތީ ޗެއާޕާސަން އަކަށް އަބްދުﷲ ވަހީދު ހޮވަން ގައުމީ އެމްޑީޕީގެ ގައުމީ މަޖިލީހުގައި ވޯޓް ނެގީ މިދިޔަ ހުކުރު ދުވަހުގެ ރެއެވެ. އެހެންނަވެސް ގައުމީ މަޖލީހުގައި މެމްބަރުންގެ އަދުގަދަވެ ގޮތެއް ނުނިންމި އެރޭގެ ޖަލްސާ ވަނީ ނިންމާލާފައެވެ.
އެރޭގެ ގައުމީ މަޖިލީހުގައި ކަން ހިނގައިދިޔަ ގޮތުގެ ހުލާސާ ރިޕޯޓެއް އެމްޑީޕީގެ ޗެއާޕާސަންގެ ނައިބު އިދާރީ މުހައްމަދު ވަހީދު ވަނީ އެކުލަވާލާފައެވެ. އެ ރިޕޯޓްގައި ބުނީ ގައުމީ މަޖލީހުގެ ބައްދަލުވުން ކުރިއަށް ގެންދިޔުމުގެ މާހައުލު ނެތިގެން ބައްދަލުވުން މެދުކަނޑާލުމަށް ފަހު އިތުރަށް ބެލި ބެލުމުން ފާހަގަވީ ދިއްދޫ ދާއިރާގެ ރައީސް އަބްދުﷲ ވަހީދު ވަގުތީ ޗެއާޕާސަންގެ މަގާމަށް އިންތިހާބު ކުރުމަށް ފެންނަކަމަށް ވޯޓު ދެއްވި މެމްބަރުންގެ އަދަދަކީ 49 މެމްބަރުން ކަމެވެ. ނަމަވެސް އެއް މެންބަރަކު ފަހުން ރިޖެކްޓް ކުރިކަމަށް ބުނާތީ އެވޯޓު އުނިކުރުމުން ދިއްދޫ ދާއިރާ ރައީސް ވަހީދު ވަގުތީ ޗެއާޕާސަން ކަމަށް އިންތިހާބުކުރުމަށް 48 ވޯޓު ލިބިފައިވާކަމަށެވެ. އަދި ވޯޓް ރިޖެޓް ކުރި މެމްބަރާ އެކު ބައްދަލވުމުގައި ވޯޓްގައި ބައިވެރި ނުވެ ތިބީ 47 މެމްބަރުންކަމަށް ވެސް އެ ރިޕޯޓްގައިވެ އެވެ.
ރިޕޯޓް އެކުލަވާލައި ފޮނުވި އިރު، ވަގުތީ ޗެއާ ހޮވަން ބޭއްވި ޖަލްސާ ނިންމާލީ މެމްބަރުންގެ މެދުގައި ދެބަސްވެ ޖަލްސާ ކުރިއަށްގެންދާނެ ޖާގަ ނެތް ކަމަށް ބުނެ އެވެ.
އެމްޑީޕީގެ ޗެއާޕާސަންގެ ނައިބު އިދާރީ މުހައްމަދު ވަހީދު އެ ޕާޓީގެ ރައީސް އަބްދުﷲ ޝާހިދަށް ފޮނުވި ސިޓީއެއްގައި ބުނީ އެރޭ ހިނގައިދިޔަ ކަންކަމަކީ ސިޔާސީ ކަމެއްކަމަށެވެ. އެހެން ކަމުން އެކަމުގައި ސިޔާސީ ހައްލެއް ހޯދާދިނުމަށް ވަނީ އެދިފައެވެ.
