ޝިފާއުއަކީ، އޭނާގެ މައްސަލަތައް ކޯޓުގައި އޮއްވައި އެގްރިކަލްޗާ އެންޑް އެނިމަލް ވެލްފެއާ މިނިސްޓްރީގެ ސީނިއާ ޕޮލިޓިކަލް ޑިރެކްޓަރުގެ މަގާމަށް މި ސަރުކާރުން "އޮޅިގެން" އައްޔަންކުރި އެވެ. މީޑިއާގައި އޭނާގެ މައްސަލަ ހާމަކުރުމާ އެކު މަގާމުން ވަކިކުރި އެވެ.
ވަގު ޓީޓީ ފޮނުވައިގެން ބޭރުގެ ކުންފުނިތަކުން ވިޔަފާރިކުރަމުން ދިޔަ މައްސަލައިގައި އުމުރު ދުވަހުގެ ޖަލު ހުކުމެއް އަންނަ ގޮތަށް، 23 ދައުވާއެއް ޝިފާއުގެ މައްޗަށް އުފުލިއިރު އޭގެ ތެރެއިން 16 ދައުވާއެއް މިއަދު ސާބިތުވިއެވެ.
ސާބިތުވީ އެނގި ހުރެ ސައްހަ ނޫން ލިޔުމެއް ދިނުމުގެ ކުށުގެ ނުވަ ދައުވާއަކާއި މަކަރާއި ހީލަތް ހެދުމުގެ ކުށުގެ ހަތް ދައުވާ އެވެ. އޭނާގެ މައްޗަށް އުފުލާފައިވާ މަނީ ލޯންޑްރިންގެ ހަތް ދައުވާއާ މެދު ފަހުން ގޮތެއް ނިންމާނެ ކަމަށް މައްސަލަ ބައްލަވާ ގާޒީ ވަނީ ވިދާޅުވެފަ އެވެ. ސާބިތުވި 16 ދައުވާގެ އަދަބު ކަނޑައެޅުން އަންނަ ހަފުތާގައި އޮންނާނެއެވެ. އެކަމަކު ކުށް ސާބިތުވުމާއެކު މިއަދު އޭނާވަނީ ހައްޔަރުކޮށްފައެވެ.
