ވަހީދު އެމްޑީޕީގެ ރައީސް އަބްދު ﷲ ޝާހިދަށް ފޮނުއްވި ސިޓީގައި ބުނެފައިވަނީ އޭނާ ނަން އަނބުރާ ނަގަން ނިންމީ އޭނާ އެ މަގާމަށް ހޮވުނު ނަމަވެސް މަގާމުގެ ޒިންމާތައް އަދާ ކުރަން ހުރަސްތަކެއް އެޅިގެންދާނެ ކަމަށް ގަބޫލު ކުރާތީ ކަމުގަ އެވެ.
އެ ސިޓީގައި އޭނާ ފާހަގަ ކުރެއްވި ގޮތުގައި އޭނާ އެ މަގާމަށް ކުރިމަތިލުމަށް ނިންމީ އެ ޕާޓީގެ ޕާލިމެންޓަރީ ގްރޫޕްގެ މެމްބަރަކު އޭނާ އަށް ގުޅުއްވާ އޭނާ އެ މަގާމަށް ކުރިމަތިލުމަށް އެދިވަޑައިގަތުމުން ކަމުގައި އެވެ.
މި ހުށަހެޅުން އޭނާއާއި ހަމަޔަށް އައުމުން ޕާޓީގެ ރައީސާއި ޕާޓީގެ އެޑްވައިޒަރުގެ ހިޔާލެއްވެސް ހޯދާފައިވާ ކަމަށާއި އެބޭފުޅުންވެސް ވިދާޅުވީ އެކަމަށް ތާއީދުކުރައްވާ ކަމުގައި ކަމަށް ވަހީދު ވިދާޅުވި އެވެ.
ޕާޓީގެ ވަގުތީ ޗެއާ އެއް ހޮވުމަށް ޕާޓީގެ ގައުމީ މަޖިލީހުގެ ޖަލްސާއެއް ފުރަތަމަ ބާއްވަން ނިންމާފައި އޮތް ދުވަހު ކެންސަލް ކުރީ އެ އިންތިހާބަށް އެެހެން ބޭފުޅަކު ކުރިމަތިލައްވައި އެ ކަމަށް ވަގުތުހޯދުުމަށް ކަން އެނގިފައިވާ ކަމަށް އޭނާ ވިދާޅުވި އެވެ.
ދެން ގައުމީ ޖަލްސާ ބޭއްވި ދުވަހު ވަގުތީ ޗެއާޕާޝަންގެ އިންތިހާބުގެ ބޯޓަށް ކެނޑިޑޭޓެއްގެ ގޮތުގައި އޭނާގެ ނަން ހުށަހެޅިގެން ދިޔުމުން ގައުމީ މަޖިލީހުގެ އަގްލަބިއްޔަތުން އޭނާ ނަން ފާސްވެގެން ދިޔަ ކަމަށް އޭނާ ފާހަގަ ކުރެއްވި އެވެ.
އޭނާ އިތުރަށް ފާހަގަ ކުރެއްވި ގޮތުގައި މި ސަބަބުތަކާއި ގުޅިގެން އޭނާ އެ އިންތިހާބު ކާމިޔާބު ކޮށްފައިވީ ނަމަވެސް އެ އިންތިހާބުގައި އޭނާ ވާދަކުރި ކުރުން އަނބުރާ ގެންދާ ކަމަށެވެ.
އޭނާ ވަނީ މި އިންތިހާބުގައި އޭނާ އަށް ވޯޓުދެއްވި ހުރިހާ ބޭފުޅުންނައް ވަރަށް ބޮޑަށް ޝުކުރު އަދާ ކޮށްފައި އެވެ.
އަދި އެ މަގާމަށް ދެން އިންތިހާބު ވެވަޑައިގަންނަވާ ބޭފުޅަކާއެކުގައި ކުރިޔަށް ދިއުމަށް ތައްޔާރަށް ހުރި ކަމަށާއި އެ ބޭފުޅަކަށް އޭނާ ފުރިހަމަ ތާއީދު ލިބިގެންދާނެ ކަމަށް ވަހީދު އެ ސިޓީގައި ބުނެފައިވެ އެވެ.
އޭނާ ވަނީ މިފަދަ ކަންކަން ކުރިޔަށް އޮތްތަނުގައިވެސް މިގޮތަށް ތަކުރާރު ނުވާނެހޭން ޕާޓީގެ ރައީސް އަދި އެޑްވައިޒަރުވެސް މަސައްކަތް ކޮށްދިނުމަށް އިލްތިމާސްކޮށްފައި އެވެ. އަދި އޭނާގެ މި ނިންމުމަކީ ޕާޓީގެ އެއްބައިވަންތަ ކަމަށް މުހިންމު ނިންމުމެއް ކަމަށް ގަބޫލު ކުރައްވާ ކަމަށް ވަހީދު ބުނި އެވެ
