އދ. މަހިބަދޫން މާލެ އަށް ދުތުކުރަމުން ދިޔަ ލޯންޗުގައި ހިނގި މި ހާދިސާގައި ވަނީ ހަތަރު މީހަކަށް އަނިޔާވެފައެވެ. އެއީ އެ ލޯންޗުގައި ތިބި ތިން ފަތުރުވެރިންނާއި ލޯންޗުގެ ފަޅުވެރިއެކެވެ.
ފުލުހުން ބުނީ މި ހާދިސާގައި އަނިޔާވި ތިން ފަތުރުވެރިންނަށް، ކްރޮސްރޯޑްސްއަށް ގެންގޮސް ފަރުވާދިން ކަމަށެވެ. އަދި، ލޯންޗުގެ ފަޅުވެރިޔާއަށް އޭޑީކޭ ހޮސްޕިޓަލުގައި ފަރުވާދެމުން އަންނަ ކަމަށް ފުލުހުން ބުނެއެވެ.
ފުލުހުން ބުނީ މި ހާދިސާ ހިނގިކަމުގެ ރިޕޯޓް ލިބިފައިވަނީ ހެނދުނު 7:30 ހާއިރު ކަމަށެވެ.
ލޯންޗުގެ ބިއްލޫރިގަނޑު ތަޅައިގެން ދާން މެދުވެރިވީ އެ ލޯންޗު އަލިހުރަސް ކަނޑުން ދަތުރުކުރަމުން ދަނިކޮށް ނެގި ރާޅެއްގައި ޖެހުމުން ކަމަށް ފުލުހުން ބުނެއެވެ.
އެ ގަޑިއަކީ އދ. އަތޮޅާއި މާލެ ސަރަހައްދު ހިމެނޭ ގޮތަށް، މެޓް އޮފީހުން ވައިޓް އެލާޓް ނެރެފައިވާ ގަޑިއެކެވެ. އެގަޑީގައި ގުގުރުމާއި އެކު ، ބޯކޮށް ވާރޭވެހި ވިލާގަނޑުގައި 40 މޭލަށް ވައިގަދަވާނެ ކަމަށް މެޓް އޮފީހުން އޮތީ ބުނެފައެވެ.
މި ހާދިސާގައި ލޯންޗަށް އެކިވަރުގެ ގެއްލުން ވެފައިވާ ކަމަށްވެސް ފުލުހުން ބުނެއެވެ.
