އެ ކުންފުނިން މައުލޫމާތު ދިން ގޮތުގައި އާންމު ހިއްސާދާރުންގެ ފަރާތުން ބޯޑު ޑިރެކްޓަރު ހޮވުމަށް ހަމަޖެހިފައިވަނީ އަންނަ އަހަރުގެ މާޗު މަހު ބާއްވާ އެ ކުންފުނީގެ އަހަރީ އާންމު ޖަލްސާގައެވެ.
މި މަގާމަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ މުހިންމު ޝަރުތުތަކެއް އުރީދޫ އިން ވަނީ ކަނޑައަޅައިފައެވެ. އޭގެ ތެރޭގައި އެ މީހަކީ ކުންފުނީގެ ހިއްސާދާރެއް ކަމުގައި ވުމާއެކު މަދުވެގެން 50 ހިއްސާ އޮތް މީހަކަށް ވާންޖެހެއެވެ. އަދި އިންޓަނޭޝަނަލް ފެންވަރުގައި ގަބޫލުކުރާ ޔުނިވާސިޓީއަކުން ޑިގްރީ ހާސިލުކޮށްފައިވުމާއި، ސަރުކާރު ނުވަތަ ޕްރައިވެޓް ސެކްޓާގެ އިސް މަގާމެއްގައި މަދުވެގެން 10 އަހަރުގެ ތަޖުރިބާ ހުރުން ހިމެނެއެވެ. މީގެ އިތުރުން ސީއެމްޑީއޭގެ "ފިޓް އެންޑް ޕްރޮޕަ" މިންގަނޑަށް ފެތޭ، އަދި ކުންފުންޏާ ވާދަވެރި ވިޔަފާރިއެއް ނުވަތަ ރެގިއުލޭޓަރީ އިދާރާއެއްގައި މަސައްކަތްކުރާ ފަރާތަކަށް ވެގެން ނުވާނެ ކަމަށް ވެސް އުރީދޫ އިން ބުންޏެވެ.
ބޯޑުގައި އަންހެނުންގެ ދައުރު ފުޅާކުރުމުގެ ސިޔާސަތުގެ ދަށުން، މި މަގާމަށް އަންހެން ބޭފުޅުން ކުރިމަތިލުމަށް އެ ކުންފުނިން ވަނީ ހާއްސަ އިސްކަމެއް ދީ، ހިތްވަރު ދީފައެވެ. މި އިންތިހާބުގައި ހޮވޭ ޑިރެކްޓަރެއްގެ ދައުރަކީ 2028 ވަނަ އަހަރުގެ އަހަރީ އާންމު ޖަލްސާއާ ހަމައަށް ކަމަށްވާއިރު، ކުރިމަތިލުމަށް ޝައުގުވެރިވާ ފަރާތްތަކުން އެޕްލިކޭޝަން ފޯމު ހުށަހެޅުމުގެ ސުންގަޑިއަކީ އަންނަ އަހަރުގެ ޖަނަވަރީ މަހުގެ 4 ވާ އާދިއްތަ ދުވަހުގެ މެންދުރު 12:00 އެވެ.
