ފެން ތަގައްޔަރުވެގެން ފުވައްމުލަކު ސިޓީން ފެނުގެ ހިދުމަތް މިދިޔަ މަހުގެ 10 ވަނަ ދުވަހު މެދުކަނޑާލާފައި އޮތުމަށްފަހު ފެން ދޫކުރަން ފެށީ އޭގެ ހަތަރު ދުވަސްފަހުންނެވެ.
ފުވައްމުލަކަށް ފެން ދޫކުރާ ފެނަކަ ކޯޕަރޭޝަނުން މިއަދު ނެރުނު ބަޔާނެއްގައި ބުނީ އެ ސިޓީއަށް ދިމާވެފައިވާ ފެނުގެ މައްސަލަ ހައްލުކޮށް ރަނގަޅު ފެންވަރެއްގައި ފެނުގެ ހިދުމަތް އަލުން ދިނުމަށް ކުރަންޖެހޭ އެންމެހައި ކަންކަން ހުއްޓުމެއްނެތި ކުރަމުންދާކަމުގެ ޔަގީންކަން ދޭކަމަށެވެ.
ފެނަކައިން ބުނީ ފުވައްމުލައް ސިޓީގެ ފެނުގެ ނެޓްވޯކްގެ މަސައްކަތްތަކެއް ކުރަމުން ދިޔއިރު އެކި ޗަގުތުތަކުގައި ފެން ކެނޑުމާއި ފެނުނުގެ ޕްރެޝަރޔ ދަށްވުން ފަދަ ކަންކަން މެދުވެރިވެފައިވާކަން ފާހަގަކުރެވިފައިވާކަމަށެވެ. އަދި އެ ސިޓީގެ ފެނުގެ ނިޒާމު އަޕްގްރޭޑްކުރުމުގެ މަސައްކަތް މިހާރުވެސް ކުރަމުން އަންނަކަމަށްވެސް ފެނަކައިން ބުނެއެވެ. އެހެންކަމުން އެކަމަށް ލުޔެއް ދިނުމަށް މިދިޔަ މަހަށް ބިލް ނުކުރަން ނިންމާފައިވާކަމަށް ފެނަކައިން ބުނެއެވެ.
ފުވައްމުލަކުގެ ފެނުގެ ހިދުމަތް މެދުކެނޑުމަށްފަހު މިހާރު އަލުން ދޫކޮށްފައިވާ ފެން ރައްކާތެރިކަމަށް ސަރުކާރުން ބުނިނަމަވެސް ސިޓީ ކައުންސިލުން ފެނުގެ ސާމްޕަލް ނަގާ ޗެކުކުރުމުގެ މަސައްކަތް ކައުންސިލުން ވަނީކޮށްފައެވެ.
