އެފްއޭއެމްގެ ފައިސާއަށް ހިޔާނަތްތެރިވެ މަނީ ލޯންޑާ ކުށް ސާބިތުވެ ބައްސާމް މިހާރުވެސް ގެންދަނީ ނުވަ އަހަރުގެ ޖަލު ހުކުމެެއް ތަންފީޒުކުރަމުންނެވެ.
ހިޔާނާތާއި މަނީ ލޯންޑްރިންގެ އިތުރު ދައުވާތަކެއް ބައްސާމްގެ މައްޗަށް އަންނަނީ ކުރަމުންނެވެ. އެއީ އެފްއޭއެމަށް ފީފާއިން ފޮނުވި 1.2 މިލިއަން ޑޮލަރު (19 މިލިއަނެއްހާ ރުފިޔާ) އަށް ބައްސާމް ހިޔާނާތްތެރިވިކަމަށް ބުނާ މައްސަލައެކެވެ. މި މައްސަލާގައި އޭނާ ބުނަމުން އަންނަނީ ރާއްޖޭގެ ކޯޓަކަށް އެ މައްސަލަ ނުބެލޭނެކަމަށެވެ. ސަބަބެއްކަމަށް އޭނާ ބުނީ އެ ފައިސާއަކީ ފީފާގެ ފައިސާކަމަށްވާތީ ކަމަށެވެ.
މި ވާހަކަތަކަށް ރައްދުދެއްވަމުން ކުރީގެ ޕްރޮސެކިއުޓާ ޖެނެރަލް ހުސައިން ޝަމީމް ވިދާޅުވީ ބައްސާމް ފަރާތުން ޝަރީއަތުގައި ނަގާ ދިފާއުގެ ސުވާލަށް ޤާނޫނުލްއުޤޫބާތުން ޖަވާބު ލިބޭކަމަށެވެ. އެގޮތުން ކުށެއްގެ ރުކުނެއް ކަމުގައިވެދާނެ އަމަލެއް ދިވެހިރާއްޖޭގައި ހިނގާ ހިނދު އެ ކުށަކަށް ރާއްޖޭގެ ގާނޫނުގެ އިހްތިސާސް ލިބޭކަމަށެވެ.
ޝަމީމް ވިދާޅުވީ ފީފާގެ މެމްބަރަކަށް ވެވެނީ ކޮންމެ ގައުމަކުން އެންމެ ޖަމްއިއްޔާއަކަށްކަމަށާއި އެޖަމްއިއްޔާއަކީ އެ ޤައުމެއްގެ ފުޓުބޯޅަ ތަމްސީލުކުރާ ރަސްމީ އިދާރާކަމަށެވެ. އެގޮތުން ރާއްޖޭގައި އެ ދައުރު އޮތީ އެފްއޭއެމްއަށް ކަން ފާހަގަކުރައްވަމުން ޝަމީމް ވިދާޅުވީ އެފްއޭއެމަށް އެ ދައުރު ލިބުނީ ސަރުކާރުގެ ހުއްދައާއެކުކަމަށެވެ. އަދި ސަރުކާރުގެ ޝަރުތަކީ ދިވެހިރާއްޖޭގައި ފުޓުބޯޅަ ތަރައްޤީކުރުންކަމަށާއި އެފްއޭއެމްއަށްލިބޭ ފައިސާއަކީ ހަގީގަތުގައި ދިވެހިރާއްޖޭގެ ފުޓުބޯޅަ ތަރައްގީކުރަން، ދިވެހި ރައްޔިތުންނަށް ލިބޭ ފައިސާކަން ޝަމީމް ވަނީ ފާހަގަކުރައްވާފައެވެ.
މިމައްސަލަ ބަލައިފިނަމަ، ފީފާއިން ދިވެހި ފުޓުބޯޅަ ސަސްޕެންޑްކޮށްފާނެކަމުގެ ކަންބޮޑުވުން ބައްސާމް އަދީލް ޖަލީލުގެ އޮތްކަމަށް ކޯޓުގައި ބުނާކަން ފާހަގަކޮށް ޝަމީމް ވިދާޅުވީ މިކަމާ ގުޅިގެން ކޯޓުން ނިންމެވިކަމަށް ރިޕޯޓު ކޮށްފައި އޮތީ، ފީފާއިން ރާއްޖެ ސަސްޕެންޑުކޮށްފައިނުވާތީ، ފީފާގެ ހައްގު ދޫކޮށްލާފައިވާކަމަށް ބަލަންޖެހޭ ކަމަށެވެ.
ފީފާއިން ރާއްޖެ ސަސްޕެންޑްކުރުމުގެ ހައްގު ދޫކޮށްލިތޯ ނުވަތަ ނޫންތޯ ކޯޓަކަށް ނިންމޭނީ ފީފާއިން އެކަމާބެހޭ ގޮތުން ދެކޭގޮތެއް ސާފުކޮށްގެންކަމަށް ޝަމީމް ވިދާޅުވިއެވެ. ވީމާ، ފަނޑިޔާރުގެ އެ ނިންމެވުން އެއީ މުޅިން ހަމަޖެހޭ ނިންމެވުމެއްކަމަކަށް ނުފެނު ނަމަވެސް، މިމައްސަލައާ ގުޅިގެން ފީފާއިން ރާއްޖެ ސަސްޕެންޑް ކުރެވިދާނެތޯ ނުވަތަ ނޫންތޯ އެއީ ފީފާއިން ނިންމާނެ ކަމެއްކަމަށް ޝަމީމް ވިދާޅުވިއެވެ.
ޝަމީމް ވިދާޅުވީ ބައްސާމް ފީފާއާ ގުޅުވައިގެން ދައްކާ ވާހަކައަކީ ހުރާފާތެއްކަމަށެވެ.
