މިއީ މިއުޒިކީ ދާއިރާގައި ނަގާކިޔާ އަދި ޒުވާނުންގެ މެދުގައި މަގުބޫލު މި ދެ ފަންނާނުންގެ ފަރާތުން ފޭނުންނަށް ލިބުނު ވަރަށް ހާއްސަ ހަދިޔާއެކެވެ.
މި ހިނގާ ޑިސެމްބަރު މަހުގެ 3 ވަނަ ދުވަހު ރިލީޒްކުރި މި ލަވައަކީ ލޮޖިކްގެ ހިތްގައިމު ރާގުތަކާއި ވިޒް ހަލީފާގެ އަމިއްލަވަންތަ ރެޕް ސްޓައިލް ވަރަށް ފުރިހަމައަށް އެކުލެވިގެންވާ ލަވައެކެވެ. މި ލަވަ ނެރުމާއެކު ސޯޝަލް މީޑިއާގައި ގިނަ ބަޔަކު އަންނަނީ މި ލަވައަށް ތައުރީފު ކުރަމުންނެވެ. އަދި މިއީ ލޮޖިކްގެ މި އަލްބަމްގައި ހިމެނޭ އެންމެ ފާހަގަކޮށްލެވޭ އެއް ލަވަ ކަމަށް މިއުޒިކީ ދާއިރާގެ ދިރާސާކުރާ ފަރާތްތަކުން ބުނެއެވެ.
އާ ލަވައިގެ އިތުރުން ވިޒް ހަލީފާ އަންނަނީ އިންޓަނޭޝަނަލް ބޮޑު ޓުއާއަކަށް ވެސް ތައްޔާރުވަމުންނެވެ. އެގޮތުން 2025 އިން 2026 އަށް ކުރިއަށް ގެންދިއުމަށް ހަމަޖެހިފައިވާ މެޝިން ގަން ކެލީ (އެމްޖީކޭ) ގެ "ލޮސްޓް އެމެރިކާނާ ޓުއާ" ގައި ފީޗާޑް އާޓިސްޓެއްގެ ގޮތުގައި ވިޒް ހަލީފާ ބައިވެރިވާނެއެވެ. މި ޓުއާގެ ތެރެއިން ގިނަ ގައުމުތަކެއްގައި ޝޯތައް ދިނުމަށް ވަނީ ހަމަޖެހިފައެވެ.
ވިޒް ހަލީފާގެ މިއުޒިކީ ހަޔާތަށް ބަލާއިރު، ދާދި ފަހުން އޭނާ ވަނީ އޭނާގެ އެންމެ މަޝްހޫރު އެއް ލަވަ ކަމަށްވާ "ބްލެކް އެންޑް ޔެލޯ" އަށް 15 އަހަރު ފުރުން ފާހަގަކޮށް، އެކަމުގެ ހަނދާންތައް އާކޮށްފައެވެ. ވިޒް ހާމަކުރި ގޮތުގައި އެ ލަވައަކީ އޭނާގެ މުޅި ދިރިއުޅުން ބަދަލުކޮށްލައި، މެއިންސްޓްރީމް މިއުޒިކް އިންޑަސްޓްރީގައި އޭނާއަށް ބޮޑު ކާމިޔާބީއެއް ހޯދައިދިން ލަވައެވެ.
މިހާރު ވެސް މިއުޒިކީ ދުނިޔޭގައި ވިޒް ހަލީފާއަކީ ނުފޫޒުގަދަ ނަމެކެވެ. ލޮޖިކް އާއެކު ނެރުނު އާ ލަވައާއި ކުރިއަށް އޮތް ބޮޑު ޓުއާއާއެކު، އޭނާގެ ފޭނުންނަށް ކުރިއަށް އޮތް ދުވަސްތަކުގައި ގިނަ އާ މަސައްކަތްތަކެއް ފެނިގެންދާނެ ކަމަށް ބެލެވެއެވެ.
