ރައީސް ޔާމީން އިސްކޮށް ހުންނަވާ އުފެއްދެވި ޕީއެންއެފްއިން ބާއްވަމުން އަންނަ ސިލްސިލާ ބައްދަލުވުންތަކުގެ ތެރެއިން ރޭ ބޭއްވި ބައްދަލުވުމުގައި ވާހަކަ ދައްކަވަމުން ޔާމީން ވިދާޅުވީ ވެރިރަށް މާލޭގެ މޭޔަރުކަމަށް ދެން ވަޑައިގަންނަވަން ޖެހޭނީ ކުރީގެ މޭޔަރުންގެ ކޮރަޕްޝަންގެ މައްސަލަތައް ބައްލަވަން ކެރޭ ބޭފުޅެއްކަމަށެވެ.
ކައުންސިލުން ހިންގާފައިވާ ކޮރަޕްޝަންގެ އަމަލުތައްކަމަށް ވިދާޅުވެ ވާހަކަ ދައްކަވަމުން ޔާމީން ވިދާޅުވީ 2023ވަނަ އަހަރުގެ ރިޔާސީ އިންތިހާބުގެ ދެ ބުރު ދޭތެރޭ އޭރުގެ މޭޔަރަކަށް ހުންނެވި ޑރ. މުހައްމަދު މުއިއްޒު މާލެއިން 20 ބިމެއް ވިއްކާލެއްވި ކަމަށެވެ. އަދި އޭރުގެ ޑެޕިއުޓީ މޭޔަރު އަހްމަދު ނަރީޝް ވަގުތީ ގޮތުން މޭޔަރުގެ ޒިންމާތައް އަދާކުރެއްވިއިރުވެސް ކޮރަޕްޝަން ހިންގިކަމަށާއި އެކަންކަން އާޒިމް ނުބައްލަވާ ކަމަށްވެސް ޔާމީން ވިދާޅުވިއެވެ.
ޔާމީން ވިދާޅުވީ އާޒިމް މާލޭގެ މޭޔަރުކަމަށް ވަޑައިގެން މިހާތަނަށް ރަނގަޅު މަސައްކަތްތަކެއް ކުރެވި ނަމަވެސް މަގާމުގެ މަސްއޫލިއްޔަތު ރަނގަޅަށް އަދާކުރެވޭތޯ ސުވާލު އުފެދޭކަމަށެވެ.
މީގެއިތުރުން އާޒިމް މޭޔަރުކަމުގައި ހުންނަވާ ގާތް މީހުންނަށް މާލޭގެ ބިންތައް ދެއްވިކަމަށްވެސް ޔާމީން ވަނީ ތުހުމަތުކުރައްވާފައެވެ. އެގޮތުން އާޒިމާއި އޭނާގެ އެއްބަނޑު އެއްބަފާ ބޭބެ އަދި މާފަންނު އުތުރު ދާއިރާގެ މެމްބަރު މުހްއްމަދު ނާޒިމްގެ ހިއްސާ އޮންނަ ރަޝީދު ކާޕެންޓްރީ އެންޑް ކޮންސްޓްރަކްޝަނާއި އެ ދެ ބޭފުޅުންނާ ގުޅުންހުރި ކުންފުނިތަކަށް ބިން ދީފައި އެބަހުރި ކަމަށްވެސް ޔާމީން ވިދާޅުވިއެވެ. އަދި އޭގެ ތެރޭގައި ދަފުތަރުގައި ނުހިމެނޭ ބިންތައްވެސް ދީފައިވާކަމަށް ޔާމީން ވިދާޅުވިއެވެ.
ލޯކަލް ކައުންސިލް އިންތިހާބު އަންނަ އޭޕްރިލްމަހުގެ 4 ވަނަދުވަހު އޮންނާނެކަން އިލެކްޝަންސް ކޮމިޝަނުން ވަނީ އިއުލާންކޮށްފައެވެ.
މާލޭގެ މޭޔަރުކަމަށް ވާދަކުރާކަން މިހާތަނަށް އިއުލާންކޮށްފައިވަނީ އިދިކޮޅު އެމްޑީޕީން އެކަންޏެވެ. އެޕާޓިން ޕްރައިމެރީގައި ވާދަކުރަނީ މިހާރުގެ މޭޔަރު އާދަމް އާޒިމާއި ކުރީގެ މެދު ހެންވޭރު ދާއިރާގެ މްމެބަރު އަލީ އާޒިމްއެވެ. ދެ ޕެކްޝަނެއް އޮތް އެމްޑީޕީގައި މާލޭ މޭޔަރުކަމަށް ދެ އާޒިމްގެ ކެމްޕޭން އަންނަނީ ފޯރިގަދަ ވަމުންނެވެ.
