ސްޕޯޓްސް މިނިސްޓަރު އަބްދުﷲ ރާފިއު (ރާއްޕެ) ވިދާޅުވި ގޮތުގައި މިއީ އެތުލީޓުންގެ ތަމްރީނުތަކަށް ބުރޫނާރާނެހެން، ތައުލީމު ހާސިލުކުރުމުގެ ފުރުސަތު ފަހިކޮށްދިނުމަށް އެ ޕްރޮގްރާމަށް ގެނައި ވަރަށް މުހިންމު ބަދަލެކެވެ.
މި ބަދަލާ އެކު، އުމުރުން ހަގު އެތުލީޓުން އޯ ލެވެލް އިމްތިހާނު ހަދަން ނުވަތަ ކިޔެވުމުގެ އެހެން ކަންކަމަށް ޓްރެއިނިން ދޫކޮށްލާފައި އާއިލާ ގާތަށް އެނބުރި ދާކަށް ނުޖެހޭނެ އެވެ. ރާފިއު ފާހަގަކުރެއްވި ގޮތުގައި އެ ކުދިން ތަމްރީނު ހަދަމުންދަނީ ރާއްޖެއިން ބޭރުގައި ކަމަށް ވިޔަސް ނުވަތަ އަމިއްލަ ރަށް ނޫން އެހެން ރަށެއްގައި ކަމަށް ވިޔަސް، ކިޔެވުމަށް ހިނގާ ހަރަދު މި ޕްރޮގްރާމްގެ ތެރެއިން ދެން ހަމަޖެހިގެންދާނެ އެވެ. މީގެ ސަބަބުން ކުޅިވަރާއި ތައުލީމު އެކުއެކީގައި ކުރިއަށް ގެންދިއުމުގެ މަގު އެތުލީޓުންނަށް ތަނަވަސް ވެގެންދާނެ އެވެ.
އަރުތަ ޕްރޮގްރާމްގެ ކަންކަން ދެން ބަލަހައްޓާނީ އަލަށް އެކުލަވާލާ ގަވާއިދެއްގެ ދަށުން، ފަސް މެންބަރުންގެ މައްޗަށް އެކުލެވޭ ހާއްސަ ކޮމިޓީއަކުންނެވެ. މިނިސްޓްރީ އާއި ކުޅިވަރާ ބެހޭ ގައުމީ މަޖިލީހާއި މޯލްޑިވްސް އޮލިމްޕިކް ކޮމިޓީގެ މެންބަރުން ހިމެނޭ މި ކޮމިޓީގެ މައިގަނޑު ޒިންމާއަކީ ސްކޮލަޝިޕަށް އެތުލީޓުން ހޮވުމާއި، އެ ކުދިންގެ ޕްރޮގްރެސް ގަވާއިދުން ރިވިއު ކުރުމެވެ. މި ހަރުދަނާ ނިޒާމުގެ ސަބަބުން އެތުލީޓުންގެ ކުރިއެރުން އެސޯސިއޭޝަންތަކަށާއި ބެލެނިވެރިންނަށް ސާފުވެ، ޕްރޮގްރާމްގެ ބޭނުން އެންމެ ހެޔޮ ގޮތުގައި ހިފޭނެ ކަމަށް މިނިސްޓަރު ވިދާޅުވި އެވެ.
