ފުލުހުން ބުނީ ރޭ 23:30 ހާއިރު އދ. ފެންފުށީގައި ހަތް މީހުންގެ ގުރޫޕަކުން ފުލުހުންނަށް އިންޒާރުދީ، ފުލުހުންގެ މުދަލަށް ގެއްލުންދީ ފުލުހުންނަށް ބިރު ދެއްކި މައްސަލައިގައި ރޭ އެކަކު ހައްޔަރުކޮށްފައިވާ ކަމަށެވެ.
އޭގެ އިތުރުން ކޯޓު އަމުރެއްގެ ދަށުންމިއަދު އަނެއް ހަ މީހުން ހައްޔަރުކޮށްފައިވާ ކަމަށް ފުލުހުން ވަނީ ބުނެފައެވެ.
ފުލުހުން ހައްޔަރުކޮށްފައިވަނީ އުމުރުން 26 އަހަރުގެ މީހާކާއި 34 އަހަރުގެ މީހަކާއި 37 އަހަރުގެ މީހަކާއި 32 އަހަރުގެ މީހަކާއި 31 އަހަރުގެ މީހެއްގެ އިތުރުން 22 އަހަރުގެ މީހަކާއި 27 އަހަރުގެ މީހުންނެވެ.
އެ ހާދިސާ ހިނގަން މެދުވެރި ވެފައިވަނީ ފެންފުށީގައި މަސްތުވާތަކެތި ބޭނުންކުރާ ބަޔަކު މަގުމަތިން ހުއްޓުވާ ޗެކް ކުރުން ގިނަ ވުމާއި މާލެ ނުވަތަ އެހެން ރަށަކުން އެރަށަށް އަންނަ ފޮށިގަނޑުތަކުގެ ތެރޭގައި އެމީހުންނަށް ނިސްބަތްވާ ތަކެތި މާ ގިނައިން ޗެކް ކުރާ ކަމަށް ބުނެ އެކަމާ ހިތްހަމަ ނުޖެހިގެން ކަމަށް ފުލުހުން ވަނީ ބުނެފައެވެ.
ފުލުހުން ބުނީ އެމީހުން ހިތްހަމަ ނުޖެހިގެން ޕޮލިސް ސްޓޭޝަން ދޮށަށް އެއްވެ ބިރު ދައްކާ މުދަލާއި ގެއްލުން ދީފައިވާ ކަމަށެވެ.
އެހާދިސާގައި އެ ހަތް މީހުންގެ ބަންދާމެދު ގޮތއް ނިންމުމަށް އދ. އޮމަދޫ މެޖިސްޓްރޭޓް ކޯޓަށް ގެންދިއުމުން، ކޯޓުން ދެ މީހަކަށް ފަސް ދުވަހުގެ މުއްދަތެއް އަދި ފަސް މީހުނަށް 10 ދުވަހުގެ މުއްދަތެއް ދީފައެވެ.
އެމައްސަލަ ފުލުހުން ތަހުގީގު ކުރަމުންދާ ކަމަށް ފުލުހުން ވަނީ ބުނެފައެވެ.
