މާއްޓޭ މިހެން ވިދާޅުވީ، އޮލިމްޕިކް ކޮމިޓީގެ ސެކެއްޓްރީ ޖެނެރަލް އަހްމަދު މަރްޒޫގު ހޯސްޓްކުރެއްވި، "ޗެޓް ވިތް ޗެމްޕްސް" އިންސްޓަގްރާމް ލައިވްގައި ވާހަކަފުޅު ދައްކަވަމުންނެވެ. އިންޑިއަން އޯޝަން އައިލެންޑް ގޭމްސް، ދެހާސް ތޭވީސްވަނަ އަހަރު އޮންނާނީ ދިވެހިރާއްޖޭގައެވެ. މި ގޮތަށް ހަމަ ޖެހުނީ، ރާއްޖޭން އެކަމަށް ބިޑުކޮށް، ބިޑު ކާމިޔާބުކުރުމުންނެވެ. އިންޑިއަން އޯޝަން އައިލެންޑް ގޭމްސް ވެގެންދާނީ ރާއްޖޭގައި ބާއްވަން ފުރުސަތު ލިބުނު ބައިނަލްއަގްވާމީ ފުރަތަމަ ކުޅިވަރު ގޭމްސް އެވެ.
މާއްޓޭ ވިދާޅުވީ، އެ ފަދަ ގޭމްސްއެއް ރާއްޖޭގައި ބާއްވަން ނިންމާ އެކަމަށް ބިޑު ކުރުމަކީ ދިވެހި ސަރުކާރުން ނިންމި ވަރަށް ރަނގަޅު ނިންމެވުމެއް ކަމަށެވެ. އަދި އެކަމުގެ ސަބަބުން އެތައް ގޮތަކުން ދިވެހި ކުޅިވަރާއި، ރާއްޖޭގެ އުމްރާނީ ތަރައްގީއަށްވެސް ވަރަށް ރަނގަޅު ހެޔޮ ބަދަލުތަކެއް އަންނާނެ ކަމަށް މާއްޓޭ ވިދާޅުވިއެވެ.
އައިއޯއައިޖީ ދެހާސް ތޭވީހުގެ ބިޑު ރާއްޖޭން ކާމިޔާބުކުރީ، މަޑަގަސްރަކައާ އައި ކޮމޮރޯސްއާ ވާދަކޮށްގެންނެވެ. އިންޑިއަން އޯޝަން އައިލެންޑް ގޭމްސްއަކީ، އިންޑިޔާ ކަނޑުގެ ޖަޒީރާ ގައުމުތަކުގެ މެދުގައި ނަވާރަ ސަތޭކަ ހަތްދިހަ ނުވަވަނަ އަހަރުން ފެށިގެން ބާއްވަމުން އަންނަ ބޮޑު ކުޅިވަރު ހަރަކާތެކެވެ. މީގެ ކުރިން މި ގޭމްސް ބާއްވާފައިވާ ގައުމުތަކަކީ ރިޔޫނިއަން އައިލެންޑްސް، މޮރިޝަސް، މަޑަގަސްކަރަ އަދި ސީޝެލްސް އެވެ.
އިންޑިއަން އޯޝަން އައިލެންޑް ގޭމްސްއަކީ ބައިނަލްއަގްވަމީ ކުޅިވަރުގެ މައިދާނުގައި ރާއްޖެއަށް އެންމެ ކާމިޔާބު ކުޅިވަރު ހަރަކާތެކެވެ. ރާއްޖެއަށް ބައިނަލްއަގްވާމީ މަލްޓި ސްޕޯޓްސް މުބާރާތެއްގައި ލިބުނު ފުރަތަމަ ރަން މެޑަލް، ދުވުންތެރިޔާ ހަސަން ސާއިދު ހޯދީ ދެހާސް ފަނަރަ ވަނަ އަހަރުގެ އިންޑިއަން އޯޝަން އައިލެންޑް ގޭމްސްގެ ސަތޭކަ މީޓަރު ދުވުމުންނެވެ. އޭނގެ ފަހުން، ދެހާސް ނަވާރަވަނަ އަހަރު ރާއްޖޭންވަނީ އިންޑިއަން އޯޝަން އައިލެންޑް ގޭމްސްގެ ޓޭބަލް ޓެނިސް ޓީމް އިވެންޓުންނާއިނ ސިންގަލްސް އަދި ޑަބަލްސް ރަންމެޑަލްގެ އިތުރުން ބެޑްމިންޓަނުންވެސް ރަން މެޑަލް ހޯދާފައެވެ.
