ހުޅުމާލެ އިންޖީނުގޭގައި ހިނގި އަލިފާނުގެ ހާދިސާގައި ލިބުނު އަނިޔާތަކަށް ފަރުވާ ދެމުން ދަނިކޮށް، ސްޓެލްކޯގެ ސުޕަވައިޒަރު އަހުމަދު އަޒްމީލް ނިޔާވުމާ ގުޅިގެން އޭނާގެ ހިދުމަތުގެ އަގު ވަޒަންކުރައްވައި ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒު ތައުޒިޔާ ވިދާޅުވެއްޖެއެވެ.
Advertisement
މިކަމާ ގުޅިގެން ރައީސް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ އަޒްމީލް ނިޔާވި ހަބަރު އެހީ ވަރަށް ފުން އަސަރާއި ހިތާމައާ އެކުގައި ކަމަށެވެ.
ވަޒީފާގެ ވާޖިބު އަދާކުރަމުން ދަނިކޮށް ހިނގި މި ހިތާމަވެރި ހާދިސާގައި ނިޔާވި އަޒްމީލަކީ ކުންފުންޏަށް ވަރަށް ހީވާގި ކަމާއެކު ހިދުމަތްކުރި މުވައްޒަފެއްކަން ރައީސް ފާހަގަކުރެއްވިއެވެ. ރައީސް ވަނީ މަރްހޫމްގެ ފުރާނައަށް ސުވަރުގޭގެ ދާއިމީ ނިއުމަތް މިންވަރުކޮށްދެއްވުން އެދި ދުއާކުރައްވާފައެވެ.
މި ހާދިސާގައި ނިޔާވިއިރު އުމުރުން 43 އަހަރުގެ އަޒްމީލަކީ ސްޓެލްކޯގައި މަސައްކަތްކުރާތާ 21 އަހަރަށް ވުރެ ގިނަ ދުވަސްވެފައިވާ ތަޖުރިބާކާރު މުވައްޒަފެކެވެ.
ރައީސް ވަނީ އަޒްމީލްގެ އާއިލާއަށާއި ސްޓެލްކޯގެ ވެރިންނަށާއި މުވައްޒަފުންނަށް ތައުޒިޔާ ފޮނުއްވައި، އާއިލާއަށް ކެތްތެރިކަން ދެއްވުން އެދިވަޑައިގެންފައެވެ. އަޒްމީލް ނިޔާވެފައިވަނީ ލިބުނު އަނިޔާތަކަށް ރާއްޖެއިން ބޭރުގައި ފަރުވާ ހޯދަމުން ދަނިކޮށެވެ.
