މިއީ ފަހަކަށް އައިސް އިންޑިއާގެ ފިލްމީ ތަރިން އެމީހުންގެ ޝަހުސިއްޔަތު ނުވަތަ ޕާސަނަލިޓީ ރައިޓްސް ރައްކާތެރިކުރުމަށް ކޯޓަށް ހުށަހަޅަމުންދާ ސިލްސިލާ މައްސަލަތަކުގެ ތެރެއިން ހުށަހެޅި މައްސަލައެކެވެ.
މި މައްސަލައިގައި ސަލްމާން ހާން ދައުވާކޮށްފައިވަނީ ވަކި ބަޔަކަށް އެނގިފައިނުވާ "ޖޯން ޑޯ" ނުވަތަ ކާކުކަން ނޭނގޭ ފަރާތްތަކާ ދެކޮޅަށް ކަމަށް ރިޕޯޓުތައް ބުނެއެވެ. މީގެ ސަބަބަކީ އިންޓަނެޓްގައި ގިނަ ފަހަރަށް މިފަދަ ގާނޫނާ ހިލާފު އަމަލުތައް ހިންގާ ފަރާތްތަކަކީ ކޮބައިކަން ދެނެގަތުމަށް ދަތިވުމެވެ. ކޯޓުން މި އަމުރު ނެރެދީފިނަމަ، ހުއްދަ ނެތި ސަލްމާންގެ ނަން ނުވަތަ ފޮޓޯ ބޭނުންކޮށްގެން އިޝްތިހާރުކުރުމާއި ވިޔަފާރިކުރުން މަނާވާނެއެވެ.
މީގެ ކުރިން ބޮލީވުޑްގެ އެހެން މަޝްހޫރު ތަރިން ކަމަށްވާ އަމީތާބް ބައްޗަން އާއި އަނީލް ކަޕޫރް އަދި ޖެކީ ޝްރޮފް ފަދަ ތަރިން ވެސް ވަނީ މިފަދަ މައްސަލަތައް ކޯޓަށް ހުށަހަޅައި ކާމިޔާބު ހޯދާފައެވެ. އެގޮތުން އަމީތާބް ބައްޗަންގެ އަޑު ނަކަލުކުރުން މަނާކޮށްފައިވާއިރު، އަނީލް ކަޕޫރްގެ މަޝްހޫރު ބަހެއް ކަމަށްވާ "ޖަކާސް" ވެސް ހުއްދަ ނެތި ބޭނުންކުރުން ކޯޓުން ވަނީ މަނާކޮށްފައެވެ. މިއީ ތަރިންގެ އަގު ވައްޓާލުމާއި އޮޅުވާލައިގެން ފައިސާ ހޯދުން ހުއްޓުވުމަށް އެޅިގެންދާ ފިޔަވަޅުތަކެކެވެ.
ޓެކްނޮލޮޖީ ކުރިއަރައިގެން ދިއުމާއެކު، އާޓިފިޝަލް އިންޓެލިޖެންސް ނުވަތަ އޭއައި ބޭނުންކޮށްގެން ތަރިންގެ އަޑާއި ސިފަ ނަކަލުކުރުން ވަނީ ވަރަށް ބޮޑަށް އިތުރުވެފައެވެ. ސަލްމާން ހާންގެ މި ހުށަހެޅުމަކީ އޭނާގެ ގާނޫނީ ހައްގުތައް ހޯދުމަށާއި، އޭނާގެ ނަން ބޭނުންކޮށްގެން ހިންގާ ސްކޭމްތަކުން އާންމުން ސަލާމަތްކުރުމަށް އެޅި މުހިންމު ފިޔަވަޅެއް ކަމަށް ގާނޫނީ މާހިރުން ދެކެއެވެ.
