އެކަމަނާ މިހެން ވިދާޅުވީ ސްޓެލްކޯއިން ނުކުޅެދުންތެރިކަން ހުންނަ 30 މީހަކަށް ވަޒީފާ ހަމަޖައްސައި، އެކަމުގެ ލިޔުން ހަވާލުކުރުމަށް މިއަދު ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވައި ވާހަކަދައްކަވަމުންނެވެ.
މިއީ ރައީސް ޑރ. މުހައްމަދު މުއިއްޒުގެ ސަރުކާރުން ހާއްސަ އިސްކަމެއް ދެއްވައިގެން، މިފަދަ ފަރާތްތައް ބާރުވެރިކުރުވުމަށް ގެންގުޅުއްވާ މުހިންމު ސިޔާސަތެކެވެ.
ޖެންޑާ މިނިސްޓަރު ޑރ. އައިޝަތު ޝިހާމް ވެސް ބައިވެރިވެވަޑައިގެންނެވި މި ރަސްމިއްޔާތުގައި، ދާދި ފަހުން ސްޓެލްކޯގެ ވަޒީފާގައި އުޅެނިކޮށް ލިބުނު އަނިޔާތަކަށް ފަރުވާ ހޯދަމުން ދަނިކޮށް ނިޔާވި އަހުމަދު އަޒްމީލްގެ ހަނދާން އާކޮށް ހަމަހިމޭންކަމުގެ ސުކޫތެއް ގެނެސްފައިވެއެވެ. އަޒްމީލް ނިޔާވުމާ ގުޅިގެން ރައީސުލްޖުމްހޫރިއްޔާއާއި އެމަނިކުފާނުގެ އަނބިކަނބަލުން ވަނީ އޭނާގެ އާއިލާއަށާއި ކުންފުނީގެ މުވައްޒަފުންނަށް ތައުޒިޔާ ފޮނުއްވައި، އެ ހިތާމައިގައި ބައިވެރިވެވަޑައިގެންފައެވެ.
