ހުޅުމާލޭ ބޮޑެތި މަގުތަކުގައި ކުދި ކުދި ސްޕީޑް ބްރޭކަރުތަކެއް އެޗްޑީސީން ހަރުކުރަން ފެށީ މިދިޔަ ސެޕްޓެމްބަރުމަހު އެވެ. އެއާއި އެކު ގިނަ ބައެއްގެ ފާޑުކިޔުންތައް އެޗްޑީސީއަށް އަމާޒުވިއެވެ. ގިނަ ބައެއްގެ ޝަކުވާއަކަށްވީ ކިތަންމެ މަޑުން އެރިނަމަވެސް އެ ސްޕީޑް ބްރޭކަރުގެ ސަބަބުން ގައިގައި ރިއްސުމެވެ.
ޕްލާސްޓިކުން ހަދާފައިވާ ކުދި ސްޕީޑް ބްރޭކަރުތަކުގެ ޝަކުވާ ބޮޑުވެފައި ވަނިކޮށް އެޗްޑީސީން މި ވަނީ އެ ބްރޭކަރުތައް ނަގަން ފަށާފައެވެ. އެގޮތުން ހުޅުމާލޭ މައި ބޮޑުމަގުގައި ހުރި ހުރިހާ ސްޕީޑް ބްރޭކަރެއް މިވަނީ ނަގާފައެވެ އެހެންނަމަވެސް އެ ބްރޭކަރުތައް ނެގި ސަބަބެއް އެޗްޑީސީން ނުބުނެއެވެ.
ރައީސް ޑރ. މުހައްމަދު މުއިއްޒު މިހާރު މާލޭގެ އެކި އަވަށްތަކުގެ ރައްޔިތުންނާ ބައްދަލުކުރެއްވުމަށް ބާއްވަމުން އަންނަ ސިލްސިލާ ބައްދަލުވުންތަކުގައި ވެސް ގިނަ ބަޔަކު ވަނީ އެ ބްރޭކަރުތަކާއި ގުޅިގެން ޝަކުވާ ހުށަހަޅާފައެވެ.
