ބޮޑު ކަންނެލި މިފްކޯއަށް ގަތުމަކީ ރައީސް ޑރ. މުއިއްޒުގެ ރިޔާސީ ވައުދެކެވެ.
މިއަހަރުގެ މަސްވެރިންގެ ދުވަސް ފާހަގަކުރުމަށް ރޭ ރ. ދުވާފަރުގައި ބޭއްބި ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ މިފްކޯއަށް ބޮޑު ކަންނެލި ގަތުމަށް އެމަނިކުފާނު ވެވަޑައިގެންނެވި ވައުދު ފުއްދުމުގެ މަސައްކަތް ކުރަމުން އަންނަކަމަށެވެ.
އެގޮތުން ހުޅުމާލޭގައި އަޅާ ކަންނެލި ޕްރޮސެސްކުރަން އަޅާ ފެސިލިިޓީ އާއި ކަނޑުއޮތް ގިރީގައި އަޅާ ޕްރޮސެސިން ފެސިލިޓީގެ މަސައްކަތް ފެށުމަކީ އޭގެ ބައެއްކަމަށެވެ. ރައީސް މުއިއްޒު ވިދާޅުވީ ބޮޑު ކަންްނެލި މިފްކޯއަށް ގަންނަ ފަށާނީ އެކަން ދެމެހެއްޓެނެވި ގޮތަށް ގެންދެވޭނެ ގޮތްތައް ޔަގީންކޮށްފައިކަމަށެވެ.
ބޮޑު ކަންނެލީގެ މަސްވެރިކަމުގައި އުޅޭ ފަރާތްތަކުން ސަރުކާރު ކުރަމުން އަންނަ މަސައްކަތްތަކަށް އެއްބާރުލުން ދިނުމަށް ރައީސް މުއިއްޒު ރޭ ވަނީ ގޮވާލައްވާފައެވެ.
ސަރުކާރުން މަސްވެރިންނަށް ވެފައިވާ ވައުދުތައް ނުފުއްދާކަމަށް ބުނެ ބޮޑު ކަންނެލި މަސްވެރިން މާލެ ސަރަހައްދުގައި މިދިޔަ ބުދަ ދުވަހުން ފެށިގެން އަންނަނީ އިހްތިޖާޖު ކުރަމުންނެވެ. މި އިހްތިޖާޖުތަކުން މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ހިމެނޭ ގޮތަށް 3 މީހަކު ބުރާސްފަތިދުވަހު ހައްޔަރުކޮށް 5 ދުވަހުގެ ބަންދުގެ މުއްދަތު ޖެހިއެވެ. އެހެންނަމަވެސް ރޭ ފުލުހުން ވަނީ މައުރޫފް ޒާކިރު ބަންދުން ދޫކޮށްލާފައެވެ.
